UMnu. Nkululeko Sibanda oyisikhulumeli somkhokheli womanyano weMDC Alliance njalo engumholi welinye lamacele eMDC-T, uMnu. Nelson Chamisa usegcizelele ukuthi abasekeli balumanyano abasoze bevume ukwethulelwa impumelo yokhetho lukamongameli engaqondanga ngoba kusobala ukuthi uMnu. Chamisa wanqoba kulolukhetho.
UMnu. Sibanda uthi ikhomishini ebona ngokuqhutshwa kokhetho eyeZEC isilayo impumela le kodwa kusobala ukuthi ifuna ukuyiguqula ukwenzela ukuthi kuthiwe umongameli Emmerson Mnangagwa okhokhela ibandla leZANU PF nguye onqobileyo.
I-ZEC iyakuphikisa lokhu isithi isahlolisisa ukhetho lolu ingakethuleli uzulu. Umthetho ukubeka sobala ukuthi iZEC kumele yethulele uzulu impumela yokhetho lolu phakathi kwensuku ezinhlanu.
UMnu. Chamisa usole ibutho lesizwe ngokudubula libulale mahlayana abantu abakade betshengisela eHarare ngoLwesithathu besola indlela i-ZEC eyethula ngayo impumela yokhetho.
Umongameli Mnangagwa usegcone umanyano we MDC Alliance ngaloludlakela.
Ngakwelinye icele, ingcwethi ecubungula ezombusazwe uDr. Priscilla Ndlovu uthi kufanele abantu batshengisele ngokuthula.