amalinks wokungena

Breaking News

AbeZimbabwe Abahlala EBhilithane Bacubungula Uhambo lweMDC Alliance


Abanye bathi uMnu. Chamisa enganqoba kukhetho oluzayo kodwa ngeke abuse.

Izizalwane zeZimbabwe ezihlala kweleBhilithane zithi ukwethekelela kwenkokheli yomanyano wamabandla aphikisayo owe MDC Alliance ezibalisa uMongameli wayo uMnu. Nelson Chamisa, uMnu David Coltart kunye loMnu. Tendai Biti ngeviki ephelileyo akubasuthisanga okungenza ukuthi babuyele ekhaya ukuya vota kukhetho oluzayo.

UMnunzana Chamisa lequla lakhe benze imihlangano embalwa lenkokheli zikahulumende weBhilithane njalo bahlangana lezizalwane zeZimbabwe ezihlala eNgilandi bekhuluma ngokhetho oluzayo. UMnumzana Zibusiso Mabuza uthi yena wahle wacatshulwa yikuthi uMnu. Chamisa wayekhuluma ngolimi ongaluzwisisiyo.

“Hayi uyabona mina uChamisa wabuya la, wahamba eBedford, wahamba wayasi addresser ngesihlobo sakhe hayi a hayi. Khonaphana wahle wangiyangisa angingeke ngivotele umuntu ongacabangeli abanye abantu ukuthi abezwa esinye isihlobo, so mina hayi angikho lapho, angeke ngikuvotele mina Chamisa.”

UNdaba Nyoni uthi uMnu Chamisa usesemncinyane kwezombusazwe

“Hayi bakithi umphakathi sizama ukuthi kesixuzulule into zikaChamisa simbona ebuya eUK lapha ezekhuluma ngendaba zombangazwe, sibona ukuthi hayi usesengumfana omncane nje kwezepolitiki njalo nje hayi lokuphosisa nje kungathi kunganeno, ungathi kwandile lapha kuChamisa ngoba siyabona ukuthi ukuthi hayi so hayi ukuthi sizovota sizovotela uChamisa hayi okwanje ungani kuzasiceza nje mbinjana asoze sibuye ekhaya sizovota okwamanje.”

Inengi labantu lithi uMnu Chamisa enganqoba kukhetho oluzayo kodwa ngeke abuse. UMnu Jojo Sigauke uchasisa lumbono.

“Ukhulumile wenze amarallies njengawenza ekhaya, wahamba wayakhuluma kuHard Talk kodwa ke into azikhulumileyo zingeke zangenza ukubana ngiye ekhaya ngikwazi ukuthi akulalutho oluzaguquka ngenxa yokuthi oMnangagwa lamabutho akhe abasoze bamvumele ukuthi abuse. Kuzahlala nje kunje njengoba kwakunjalo ngesikhathi sikaMugabe, hayi mina angiziboni ngibuyela ekhaya okwakhathesi.”

Ukuxoxa lomsakazo weBBC kuhlelo olubizwa ngokuthi: Hard Talk uMnumzana Chamisa uzibone esenkingeni ebuzwa imbuzo elukhuni egoqela ubudlwangudlwangu kubandla lakhe kunye lakuthembisa uzulu kumarallies, inengi elithi akungeke kufezeke kweleZimbabwe. Usolwe ngabantu abanengi ngokungaphenduli kuhle imibuzo kuloluhlelo. Kodwa abasekeli bakaMnu. Chamisa kanye leziphathamandla zeMDC Alliance ezigoqela uMnu. Welshman Ncube zithi uMnu. Chamisa uphendule kuhle imibuzo.

Abanye njalo bathi intathelizindaba ebixoxisana laye, uMnu. Stephen Sackur ubelukhuni njalo emeyisa uMnu. Chamisa, kukanti abanye bathi kuvele kubuzwa imibuzo elukhuni kulokuhlelo.

Udaba lolu lungenelwe ngusikhwicamfundo uMnu. Jonathan Moyo, yena obesekela uMnu. Chamisa esithi kusobala ukuthi uhulumende weBhilithane ufuna umongameli Mnangagwa anqobe kukhetho. Kodwa uhulumende weBhilithane ubikwa ephikise amazwi kaMnu. Moyo, esithi kalahlangothi alusekelayo kwezombusazwe njalo uyancedisa ukuthi kube lokhetho olukhululekileyo eZimbabwe.

please wait

No media source currently available

0:00 0:03:21 0:00


XS
SM
MD
LG