Annastacia Ndlovu
Amalunga ebandla leMovement for Democratic Change (MDC) ekhokhelwa nguMnu. Welshman Ncube edolobheni leGwanda sebephume kulelobandla bayangena ibandla leZAPU besola inkokheli yabo ngokunyamalala ngemva kokhetho, ukungabi lenhlelo ezikhanyayo zokuthuthukisa lelobandla kanye lokulwa okukumanyano owe MDC Alliance.
Amalunga ebandla leli angene umhlangano weZAPU eGaranyemba eGwanda bamaphambi komphakathi bebika ukuba abajabuli ngobukhokheli buka Ncube njalo lokhe kwedlula ukhetho luka 2013 kazange agxobe kuleyondawo.
Bathi isigaba sabo asilantuthuko, abalamanzi njalo akulamigwaqo ehambekayo.
Omunye wabahlamuke kubandla leli nguMnu. Canaan Ncube, otshele umphakathi ukuthi sekungcono ukubuyela kuZAPU ngoba amabandla ababekhangelele ukuba azabakhupha ebunzimeni asesilwa.
UNkosazana Sethukilke Moyo laye uchaze ukuba bayahlukuluzwa libandla leZANU, kodwa sebebone kungcono ukuza kuZAPU.
UMnu. Wilson Mabhena uthi usebuyela nje kuZAPU ngoba esebona kungcono enze njalo ukwenzela ukuthi aphande kahle okokuziphilisa.
UMgcinisihlalo weZAPU esabelweni seMatabeleland South, uMnu. Mathew Sibanda, uchaze ukuba esigabeni sakhe sebelandwe ngabantu abanengi abasuka kumabandla aphikisayo lelibusayo besola ubudlwangudlwangu lokungabi lentuthuko.
Ibandla leZAPU belilomhlangano eGaranyemba eGwanda behamba bekhankasela ukuba bavotelwe.
IZimbabwe iphakathi kokulungiselela ukhetho lonyaka njalo abantu abadlula izigi ezinhlanu benelise ukubhalisela ukuvota ngaphansi kohlelo olweBVR.
Ukungena lokuphuma kwamalunga amabandla kuvamile ezweni uma kuthe kwaba lokungaphathani kahle kumabandla ezombuso.
