Abalandeli bebandla leMDC-T bathi sebedlela evalweni ngoba bethuselwa ngabaselela ibandla elibusayo eleZanu PF.
Lokhu kwethulwe yinkokheli yebandla leli labalendeli beMDC-T abangene umhlangano omkhulu elokitshini leKuwadzana East ngeSonto wokukhankasela ukhetho oluzakwenziwa ngomnyaka ozayo.
Ummeli webandla leli endaweni le, uMnu. Nelson Chamisa, uthe abantu bayethuselwa ngabalandeli bebandla leZanu PF.
UChamisa uphinde watshela lumhlangano ukuba okufunwa ngabe Zanu PF yikuba kuguqulwe indlela okudingwa ngayo uChief Justice.
Uthe bafuna ukuthi uMongameli Robert Mugabe azidingele ongangena esikhundleni lesi kulokuthi kubanjiswanwe leJustice Commission.
Inkokheli ye MDC-T, ebisemhlanganweni ithethe lelithuba ukusola isehlakalo sokutshiswa kwemota yebandla leli ngeviki ephelileyo ngabacatshangelwa ukuba ngabe Zanu PF.
Umgcinisikhwama wohlangothi lwabontanga e Kuwadzana East, uNkosazana Mayit Masuku, upha umbono wakhe phezu kwalesi sehlakalo.
UMasuku uthe kunje yena lenye inkokheli yabontanga, behlezi besethuselwa kokuphela, ngabanye babo abe Zanu PF, bebathembisa ukuba bazobathwalisa amagabha avuzayo ukhetho luka 2018 selwedlule.
Ibikwa seyavuselelwa leyondawo eyayisetshenziswa ukuhlukumeza abalandeli bamabandla aphikisayo, abadala abaziwayo ukuba bengabalandeli balamabandla,bethathwa emadabukakusa, besiwa kuleyo ndawo.