amalinks wokungena

Breaking News

MDC: Uhlelo Lokutshengisela Luyaqhubeka ngoLwesihlanu


Isikhulumeli seMDC uMnu. Daniel Molokele emhlanganweni lentathelizindaba bekhuluma ngohlelo lwab lokutshengisela

Abebandla eliphikisayo eleMDC, elikhokhelwa nguMnu. Nelson Chamisa bathi amalungiselelo okutshengisela kwangoLwesihlanu edolobheni le Harare, aqhubekela phambili kuhle kungelani lokwethuselwa lokuhlukunyezwa kwamalunga abo abanye bebotshwa abanye bethunjwa njalo sekuke kwaba lemibiko yamanga ekade isabalaliswa enkundleni zokuxhumana lokuzilibazisa yokuthi lokhu kutshengisela akuseyi kuqhubeka.

Ekhuluma emhlanganweni lentathelizindaba esigodlweni seMDC eseMorgan Tsvangirai House eHarare, isikhulumeli sebandla leli, umnumzana Daniel Molokele uthe ngoLwesihlanu ibandla lakhe lizaqhubekela phambili litshengisela phezu kokonakala kwesimo elizweni.

Isikhulumeli seMDC uMnu. Daniel Molokele
Isikhulumeli seMDC uMnu. Daniel Molokele

Ukhuthaze abantu bonke abasekela loba abangasekeli bandla lakhe abakhonona ngesimo esikhona elizweni ukuthi bazemanyana labo eHarare ngoLwesihlanu.

Ngemva kokutshengisela eHarare, uthi bazaqhubekela phambili ngoMvulo weviki ezayo besiya koBulawayo lapho abazakwenza okufanayo.

NgoLwesibili bazalubhekisa eGweru, kuthi ngoLwesithathu baye eMasvingo besuka lapho baye eMutare ngoLwesine, ethi lokhu kutshengisela kuzaqhubekela phambili uHulumende kaMnangagwa aze abone ukuthi uzulu akasela themba laye.

“Thina njengenhlanganiso ye MDC sifuna ukwazisa ama Zimbabweans wonke ukuthi ngamanga aluhlaza tshoko ukuthi akusela kutshengisela ngoLwesihlanu. NgoLwesihlanu 16 August siyaqhubekela phambili ngomsebenzi wethu wokutshengisela so ngamanga amakhulu kakhulu. Sikhuthaza ama Zimbabwe wonke ukuthi abuye ngobunengi bawo. Njalo asimi eHarare kuphela, ngoMvulo siyabe sikoBulawayo, ngoLwesibili siyabe siseGweru, ngoLwesithathu siyabe siseMasvingo, ngoLwesine siyabe siseMutare. Amanye amadolobho siyabe silitshela nxa sesilungiselele.”

UMolokele uqhubeke ethi ibandla lakhe likhathazekile kakhulu ngokuthunjwa kwamalunga alo okuyinto athe iveza ukuba uhulumende useyethuswe luhlelo lokutshengisela kuka zulu ngoLwesihlanu.

“Kukhanya sekulabanye asebeyethukile njalo sicabangela ukuthi basebenza le ZANU PF kumbe le CIO ukuthgi bazame ukwethusela abantu ngoba babonile ukuthi abantu be Harare sebelungiselela oLwesihlanu, sebehamba belandelela abantu ezindlini zabo bezama ukuthi bethusele abantu so sicabangela ukuthi ngumsebenzi weZANU PF labangane babo.”

Kulamalunga awe MDC abikwa athunjiweyo ngekhefu elisanda kwedlula, atshaywa atshiywa elimele kakubi.

UMnu. Blessing Kanotunga obhaxabulwe kakubi
UMnu. Blessing Kanotunga obhaxabulwe kakubi

UBlessing Kanotunga isiphathamandla sogatsha lwabatsha eMufakose ubikwa ethunjwe ngamadoda amahlanu akade alemibhobho emzini wakhe ngempelaviki.

UKanotunga yena okade elimele kabi uthe akade ekutshayelwa yikuthi bebefuna abaphe ulwazi ngokuqoqwa yiMDC ngaphambilini kokutshengisela kwangoLwesihlanu.

"Kwabuya amadoda amahlanu oyedwa wakhona wasala esemoteni kodwa abanye bakhona bangingenela endlini ngilomkami bebambe imibhobho. Baqalisa ngokuthi ngibazise ibizo lami ngakwenza lokho. Bangibuza ukuthi njengo Chairman weMufakosi kuyini engikuphiwa nguChamis. Bangibamba ngamandla bengisa emoteni yabo. Bangikhothamisa ikhanda bangibopha ubuso ngelembu eliluhlaza. Baqalisa ukungitshaya eqolo batshayela imota. Kodwa abaqhubekeloa phambili bengibuza ngesikhathi bengitshaya yikuthi uChamisa ulitsheleni mayelana lohlelo lokutshengisela".

Kodwa umnumzana Dexta Nduna olilunga le ZANU PF emele iChegutu West uthe ibandla lakhe aliphathekanga ngitsho lakancane ngokwenziwa yiMDC.

“Thina indaba zeMDC asizingeneli kodwa kufanele ngikhulume ngendaba ye MOPA le ekhupha IPOSA. Indaba ekhona yikuthi nxa umuntu oyabe ebizele ukutshengisela, nxa kungabhidlizwa izinto kumbe kuntshontshwe kumbe izinto zabantu abakumabhizimusi zingatshabalala yena lo umuntu oyabe ebizele ukutshengisela nguye ozabhadala. So yiyo indaba ekhona. Indaba yokuthi iMDC isimiswe yiZANU PF nxa ihambise uhlelo lwayo ngendlela esmthethweni angiboni ukuthi iZANU PF ingamisa njani”

Abebandla le MDC bathi ukutshengisela okuqalela eHarare ngoLwesihlanu kuzakuba yisahluko sakuqala kuhlelo lwe MDC olwe RELOAD lapho abakhangelele ukuthi bazaqhubekela befuqa uhulumende kaMnangagwa ekukhulumisaneni labo.

Udaba lwabeMDC abalungiselela ukutshengisela siluphiwa nguGibson Bhebhe
please wait

No media source currently available

0:00 0:03:19 0:00

Facebook Forum

XS
SM
MD
LG