Ibandla leMDC-T lithi kalikholwa ukuthi uMongameli Emmerson Mnangagwa uqinisile ngamazwi akhe okuthi uhulumende wakhe uzimisele ukuqhuba ukhetho oluzayo ngokuthula.
Ekhuluma emhlanganweni awenze lezinduna eGweru ngoMgqibelo, uMnangagwa uthe uzulu kumele etshiyane lodlakela njalo ehlalisane ngokuthula kungakhathalekile ukuthi umuntu usekela liphi ibandla.
UMnu Robert Mugabe laye wayevame ukuhlabela ingoma efanayo esanguMongameli kodwa kuthi sokufika isikhathi sokhetho amalunga ebandla lakhe leZanu PF ehlukuluze abasekeli bamabandla aphikisayo.
Umsekeli wesikhulumeli sebandla leMDC-T uNkosazana Thabitha Khumalo uthi kungaba yinto enhle kakhulu alubana uMnangagwa ethe wehlukana lodlakela, kodwa uthi kakuboni kusenzeka lokhu.
“Esesikubonile selokhe uMnangagwa engene embuseni yikuthi akukhulumayo akuhambelani lokwenzakalayo phansi lapha kuzulu,” kutsho uMaKhumalo.
“Sibonile betshaya abantwana abalabazali ababulawa yiGukurahundi betshengisela eTrade Fair. Ngakho, osokuguqukile asikuboni.”
