amalinks wokungena

'Kumele Iqembu Lesizwe Lihlale Lidlala Imidlalo Yokuzwana Amandla'

  • Joseph Njanji

Sithethelelwe 'Kwinji 15' Sibanda

Umqeqetshi weqembu labesifazane elimela ilizwe emdlalweni wenguqu elama Mighty Warriors, uSithethelelwe Sibanda, uthi umkhuba wokubumba iqembu sokuvele sokulungiselelwa umncintiswano othile kumele uphele.

Iqembu le Mighty Warriors liphutshe lisendaweni yesibili kumncintiswano walonyaka owe COSAFA Women’s Championships ofike komlindi uyacina ngeSonto ngemva kokuba linqotshwe ngele South Africa nge 2 ka 1 kufinal eqhutshelwe enkundleni yeBarbourfields.

Ekhuluma emaphethelweni omdlalo umqeqetshi waleliqembu uSithethelelwe ‘Kwinji 15” Sibanda uthe isikhalazo sakhe yikuba kungalindelwa ukuba kuhlanganiswe iqembu nxa sokumele iqembu liyephatheka kumncintiswano othile kodwa kumele iqembu lesizwe lihlale lidlala imidlalo yokuzwana amandla lamanye amazwe ukuze abadlali bejwayele.

“Ukuthi sihlanganise iqembu kuphela nxa sesibhekane lomncintiswano othile yikho okwenza ukuthi abadlali bethu nxa bengena kweminye imncintiswano baqalise belokwesaba mbijana kodwa bengabe bedlala bayabe belokhu besiba lesibindi. Lamaqembu abasakhulayo amela ilizwe lawo kumele ehlale edlala ukwenzela ukuba loba nxa sebezodlala kulelizinga bengayethuki.”

Iqembu leZimbabwe Mighty Warriors.
Iqembu leZimbabwe Mighty Warriors.

Unozinti weqembu le Mighty Warriors uChido Dzingirai nguye okhethwe ukuba nguye obambe ibhola okwedlula abanye bonke kumncintiswano walonyaka ikanti umgadli weqembu le Zimbabwe uRutendo Makore nguye othethe isicoco esokuba ngumgadli olitshayele kanengi emambuleni ngemva kokuba ehlohle amagoli alitshumi.

Iqembu elimela ilizwe le Kenya lona elingasiyo ngxenye yamazwe angaphansi kombuthano weCOSAFA kodwa ebelimenyiwe ukuzophatheka kulumncintiswano njengezethekeli yilo eliphiwe umvuzo wokuba liqembu elilembeko.

Umqeqetshi weqembu le Banyana Banyana uDesiree Ellis yena ubengowakuqala ukuphakamisa inkezo ye COSAFA engumdlali lalapho esengumqeqetshi. UEllis uphakamise linkezo ngomnyaka ka 2002 ikanti lokhu bekungokwesine ukuba iqembu le Banyana Banyana liphakamise linkezo.

Imbababazane yomgadli weqembu le Banyana Banyana uThembi Kgatlana nguye okhethwe ukuba ngumdlali odlale kuhle kulabanye bonke kumncintiswano walonyaka.

UKgatlana uhlohle igoli lakuqala eleqembu le Banyana Banyana ngeSonto kwathi elesibili lihlohlwe ngu Leandra Smeda ikanti iqembu le Zimbabwe lihlohlelwe ngu Makore owaziwa ngegama elokusoma elithi Madzimai.

Iqembu le Mighty Warriors yilo ebeliphethe linkezo ngemva kokunqoba kumncintiswano oqhutshwe ngomnyaka ka 2011 esigodlweni selizwe le Zimbabwe ese Harare.

Facebook Forum

XS
SM
MD
LG