amalinks wokungena

Breaking News

Mkhululi Moyo: Ngifuna Isicoco seGolden Boot Lonyaka


Umgadli weqembu le Bulawayo City uMkhululi Moyo.
Umgadli weqembu le Bulawayo City uMkhululi Moyo.

Umgadli weqembu le Bulawayo City uMkhululi Moyo ufunga uthi lonyaka nguye ozaphakamisa isicoco esokuba ngumgadli olitshayele kanengi emambuleni esigabeni se Premier Soccer League.

UMoyo utsho lokhu ngemva kokuba elitshayele kabili emambuleni emdlalweni weqembu lakhe lele Shabanie Mine ngoMgqibelo.

Lumdlalo uphele iqembu le Bulawayo City linqobe nge 3 ka nya ikanti amagoli kaMoyo atsho ukuba usehlohle amagoli ayisithupha kumidlalo yalonyaka njalo uthi akusensuku zatshwala engedlulanga amagoli alitshumi okulinani ebeselihlohlwe ngumgadli obedlalela iqembu le Bantu Rovers uBukhosi Sibanda yena osewaya dlala elizweni le South Africa.

“Ngilamagoli ayisithupha okwamanje. Ngizambamba, ngizamdlula, itop goal scorer yimi lonyaka. Ngilayo itarget lomqeqetshi wami laye ngamtshela.”

Umgadli weqembu le Ngezi Platinum Stars uTerrence Dzvukamanja ngomunye laye okhangelele isicoco se Golden Boot njengoba esehlohle amagoli ayisikhombisa ngemva kokuba ehlohle kanye lapho iqembu lakhe litshaya ele How Mine nge 2 ka 1 ngoMgqibelo.

Limpumela ibuyisele iqembu le Ngezi Platinum Stars phezu kwengalane yemiklomelo njengoba iqembu ebelikhokhela singena kumidlalo yangempelaviki ele Chicken Inn libe ngutshiki lobhanqa 1 ka 1 lele FC Platinum.

Iqembu le Ngezi lilemiklomelo engamatshumi amane njalo litshiya ele Chicken Inn ngomklomelo owodwa kuthi endaweni yesithathu kuleqembu le Dynamos lona elilemiklomelo engamatshumi amathathu lesithupha njalo elinqobe ele Black Rhinos nge 1 ka nya.

Iqembu le FC Platinum lihlezi endaweni yesine njalo lilingene ngemiklomelo leqembu le Dynamos kuthi endaweni yesihlanu kuleqembu le How Mine elilemiklomelo engamatshumi amathathu lantathu ikanti ele Highlanders lona elibe ngutshiki lobhanqa 0 – 0 leqembu le Harare City lisendaweni yesithupha lilemiklomelo engamatshumi amathathu lambili.

Emsileni wengalane iqembu le Tsholotsho lithole umklomelo owodwa lakhuphula inani lemiklomelo elilayo yaba yithoba minwe mbili ngemva kokuba libe ngutshiki lobhanqa 0 -0 lele Yadah kwathi iqembu elihlezi endaweni yesibili nxa usuka emsileni ele Bantu Rovers linqotshwe nge 1 ka nya ngele Triangle.

Intshantshu zanyakenye iqembu le CAPS United zihlezi endaweni yesithathu nxa usuka emsileni zilemiklomelo elitshumi lesikhombisa njalo leli qembu lize lanqoba ngemva kwemidlalo embalwa lapho litshaya ele ZPC Kariba nge 1 ka nya ngeSonto.

XS
SM
MD
LG