amalinks wokungena

Breaking News

Mnangagwa: Kabafiki Ku20,000 Abantu Ababulawa yiGukurahundi


UMongameli Emmerson Mnangagwa uthi kaliqondanga inani labantu abazinkulungwane ezingamatshumi amabili (20, 000) elibikwa labulawa ngumbuqazwe weGukurahundi eMidlands laseMatabaleland.

Ekhuluma eseDavos, kweleSwitzerland emhlanganweni weWorld Economic Forum ngoLwesithathu, uMnangagwa uthe akalikholwa lelinani, esithi lingaba liphezulu kakhulu.

Ucwangingo olwenziwa yiCatholic Commission for Justice and Peace in Zimbabwe yilo olwaveza ukuthi ibutho leFifth Brigade labulala abantu abedlula inkulungwane ezingamatshumi amabili.

Kodwa uMnangagwa uthi uhulumende wakhe usethethe amanyathelo okulungisisa loludaba ngokubumba ikomishini ebona ngokuxolelana lokwethula umthetho ojonge okufanayo.

“Ngiyakuzwisisa ukuthi inani lelo yilo elikhulunywayo kodwa angikholwa ukuthi yilo inani eliqondileyo,” kutsho uMnangagwa.

“Okuqakathekileyo yikuthi sesibumbe ikomishini ezaluhluza loludaba. Kumele sibe lilizwe elilabantu ababambeneyo njalo abathandanayo abasebenza ndawonye.”

Ebuzwa ukuthi njengomuntu owayekuhulumende kaMugabe laye ngesikhathi seGukurahundi uyaxolisa na, uMnangagwa uqine ngokuthi uhulumende wakhe uphakathi kokululungisisa loludaba.

Ekhuluma ngodaba lokhetho, uMnangagwa uthe ukhetho lolu luzakwenziwa inyanga kaNtulikazi ingakafiki; wathembisa ukuthi luzaqhutshwa ngendlela esuthisayo.

Uthembise njalo ukuthi kasoze avumele udlakela lanxa nje ethe izephulamthetho ziyatholakala ngaso sonke isikhathi. Uzekelise ngeBhayibhili esithi ngitsho lemilayo elitshumi abantu bayephula mihla lamalanga kodwa beyazi.

Ebuzwa ngokuthi yebo uhulumende wakhe wanquma ukuthi uMugabe lomkakhe uGrace kabasoze babotshwe nxa bethe betheswa amacala, uMnangagwa uthe akunjalo.

Uthe ababili laba bengephula umthetho akulalutho oluzakwenza bengabotshwa.

Kodwa ingcwethi kwezombusazwe uMnu Dinizulu Macaphulana usole amazwi kaMnangagwa ngodaba lweGukurahundi esithi ukwala kwakhe ukuthi kwabulawa abantu abangu20.000 kuveza sobala ukuthi kazimiselanga ukululungisisa loludaba.

please wait

No media source currently available

0:00 0:02:49 0:00

Facebook Forum

XS
SM
MD
LG