UMongameli Emmerson Mnangagwa usethembise ukuthi uzasebenza ngamandla akhe wonke ukuthi ancedise amakhansili abhekane lomkhuhlane wesihudo.
Wethule lokhu ngoLwesithathu ngesikhathi esethekelela indawo lapho okwelatshwa khona abahlaselwe ngumkhuhlane wesihudo seCholera eGlenview 1 Poly Clinic lesibhedlela seBeatrice Infectious Diseases Hospital.
Uthe uzasebenza kakhulu njalo ukuthi kube lamanzi ahlanzekileyo endaweni ezitshiyeneyo ukwenzela ukuthi kungamemetheki umkhuhlane lo osubulele abantu abangamatshumi amathathu lambili.
Uhulumende usebuthanisa imali ngaphansi kwesikhwama esibizwa ngokuthi yiCholera Crowd Fund yokunceda abahlaselwe ngumkhuhlane lo.
Wethekelele indawo ezimbalwa elabasekeli bakhe, uMnu. Kembo Mohadi loRetired General Constantino Chiwenga lezinye iziphathamandla zikahulumende.
UMayor we Harare uKhansila Hebert Gomba utshele intathelizindaba ukuba umanisipala laye wenza konke okusemandleni akhe ukulungisisa imbangela enkulu yokuqhamuka kweCholera.
Mnangagwa utshele esinye sezigulane ahlangane laso eGlenview Poly Clinic, uNigel Karimasoro, ukuba uzomhlawulela imfundo yakhe aze ayefika kuForm Six.
Umkhuhlane lo usuhlasele abantu abedlula inkulungwane eziyisikhombisa – 7,000.
Ngakolunye udaba oluphathelane leCholera, umphathintambo wezemali uMnu. Mthuli Ncube, uphawule okusemthethweni isikhwama sokubuthanisa imali lempahla yokusebenzisa ukulwisana lokusabalala kweCholera evela kumankampani, uzulu labenhlanganiso zakwamanye amazwe iCholera Crowd Fund.
Abanye babanikeze usizo babalisa abebhanga leECOBANK, Grain Millers’ Association, Zimplats, Pharmaceutical Company, inkampani ethengisa amafutha yeTotal Petroleum, Rainbow Tourism Group, Environmental Management Agency, Zimbabwe Council of Churches labanye.
