amalinks wokungena

Breaking News

Iyaphumelela Na Imizamo Kamongameli Mnangagwa Eyokuvuselela Umnotho Welizwe?


UMongameli Emmerson Mnangagwa usekhuthaze osomabhizimusi beZimbabwe abahlala eRwanda ukuthi bezosungula umsebenzi ekhaya.

UMongameli Emmerson Mnangagwa usekhuthaze osomabhizimusi beZimbabwe abahlala eRwanda ukuthi bezosungula umsebenzi ekhaya, ikakhulu kweziphathelane lokwenjiwa kwamatshe aligugu kanye lezokulima.

Le ngeminye yemizamo embalwa eyenziwa ngumongameli Mnangagwa ukuvuselela umnotho welizwe, eyamukelwa ngembono etshiyeneyo ngumphakathi.

Isiphathamandla sebandla leZANU PF, uMnu. Joseph Tshuma, uthi sokulempawu ezikhomba ukuthi osomabhizimusi bayamlalela umongameli Mnangagwa ngoba bayeza elizweni ukuzozwisisa ukuthi bengasungula njani umsebenzi.

Kodwa ingcwethi ecubungula ezombusazwe uMnu. Zenzele Ndebele uthi lokhu akukacaci ngoba abantu abakwazi ukuthi kuzakwenzakalani nxa ukhetho oluzayo lungakhululekanga kumbe umongameli Mnangagwa enganqotshwa kulolukhetho.

Umongameli Mnangagwa usanda ukwethula uluhlu lwamabizo amankampani abikwa asusa imali elizweni ayisa kwamanye amazwe, okubikwa kwangezelela ukuswelakala kwemali elizweni. Inengi lisole uluhlu lolu lisithi kungani amabizo eziphathamandla zikahulumende engekho kulo.

UMnu. Ndebele loMnu. Tshuma bayavumelana ukuthi inyathelo leli alisoze liphathise ilizwe nxa kungazakali ukuthi ngubani owayecatsha ngamankampani la. Kodwa lanxa kunjalo, uMnu. Ndebele, uthi kusobala ukuthi amankampani la ayesebenzisa imali le ukuthenga impahla phandle kwelizwe njengoba mhlawumbe zazingekho eZimbabwe.

Ngakho-ke uthi uluhlu lwamabizo lolu alulancedo olukhulu, ikakhulu nxa inani lemali ebikwa yakhutshwa elizweni liqathaniswa le$15 billion ebikwa ingazakali ukuthi yasiwa ngaphi nguhulumende owayekhokhelwa nguMnu. Robert Mugabe.

Kusenjalo, uhulumende usesayine umthetho weIndeginization and Economic Empowerment Act, ukuthi uqalise ukusebenza ngokusemthethweni, ngemva kokuwuguqula ukuthi osomabhizimusi bakwamanye amazwe bengabelani ingxenye yamabhizimusi abo lezizalwane zeZimbabwe, ngaphandle kwenhlangothi ezimbalwa. Lolu ngolunye lwenhlelo uhulumende athi zizahuga osomabhizimusi zivuselele umnotho welizwe.

USithandekile Mhlanga Uyalandisa
please wait

No media source currently available

0:00 0:04:46 0:00

Facebook Forum

XS
SM
MD
LG