Ibandla leMthwakazi Republic Party (MRP) seliqalisile ukukhankasela ukuvotelwa eNkayi, njalo beliseGwitshi leZinyangeni ngoMgqibelo, kulandela ukuthola imvumo yokwenza imihlangano eyisithupha phakathi kwamalanga amathathu. NgoLwesihlanu, ibandla leli beliseTshanke, leGuwe.
Ekhuluma esemhlanganweni eTshanke, uMongameli weMRP, uMnu. Mqondisi Moyo uthe bayajabula ukuba sebeze bafinyelela eNkayi.
Isakhamuzi seTshanke, uMnu. Velile Nyoni wamukele ngokujabula ibandla leMRP, wathi amasotsha ahamba ehlukuluza abantu ebengakafiki eTshanke.
Esinye njalo isakhamuzi seTshanke, uMnunzana Ezekiel Ngwenya laye ubonge kakhulu ukuza kweMRP.
Evumelana loMnu. Ngwenya uMnu. Leopold Magadula isakhamuzi seTshanke uthe uselindele ukuyavota okwakuqala
Izakhamizi zeTshanke zithi azisoze zivume ukubanjwa ngamandla ukuthi kulotshwe inombolo zazo ezokubhalisela ukuvota ngaphansi kohlelo lweBVR,ezama serial numbers.
INkayi ngesinye seziqinti zelizwe esibikwa silobuyanga obudlulise amalawulo. Lokhu kwaphuma kuphenyo olwenziwa nguhulumende njalo lesisisqinti ngesinye esahlukumezeka kakhulu ngesikhathi sombhuqazwe weGukurahundi.
Ngensonto ibandla leMRP lizaqhuba imihlangano endaweni yamabhizimusi eNkayi Centre leZenka.
