amalinks wokungena

Breaking News

Ngizazibophela Nxa uChamisa loElizabeth Bengeza Emngcwabeni, Kufunga uMama kaTsvangirai


Umama kamuyi uMnu Morgan Tsvangirai ufungile ngoMgqibelo wathi uzazibophela afe nxa umfelokazi kaTsvangirai, uElizabeth loMnu Nelson Chamisa bengabakhona emngcwabeni kaTsvangirai.

Ngakolunye uhlangothi, umnewabo kaTsvangirai uMnu Collins ufuqe uChamisa egcekeni lendizamtshina eHarare ngoMgqibelo waphosa wawa, esithi kafuni lakumbona.

UNakaTsvangirai uphume emsakazweni weZBC ethukuthele ngoMgqibelo.

Elayela umzukulu wakhe, uthe: “Utshele omalume bakho ukuthi uElizabeth, uChamisa labantu bakhe angifuni kubabona lapha. Bengabuya emngcwabeni ngingazibophela ngizibulale.”

Asenelisanga ukuzwa ukuthi kahle-kahle cala bani elingaba lidalwe ngababili laba elenze unaTsvangirai wathukuthela kangaka wathembisa lokuzibophela.

Osiyazi bathi okwengezelele inzondo obivele ikhona emulini kaTsvangirai ngoChamisa yikukhethwa kwakhe ukuba ngumkhokheli weMDC-T kungakedluli lamahola amangaki uTsvangirai efile.

UTsvangirai ufe ngoLwesithathu, kwathi ngoLwesine uChamisa wakhethwa ngezinye iziphathamandla zeMDC-T ukuba aphathe isikhundla sikaTsvangirai okomnyaka.

Asenelisanga ukukhuluma loChamisa loElizabeth ngaloludaba.

Facebook Forum

XS
SM
MD
LG