amalinks wokungena

Breaking News

Norman Mapeza: Kalizange Liyangise Iqembu Lami eleFC Platinum


Umqeqetshi weqembu lenguqu ele FC Platinum uNorman Mapeza

Iqembu lenguqu ele FC Platinum litshaywe nge 2 ka nya liqembu le Esperance elase Tunisia emdlalweni walo wesibili owesibaya sika Group B kumncintiswano walonyaka owe Total CAF Champions league okuyimpumela elitshiye lihlezi endaweni yesithathu engalaneni yemiklomelo lilomklomelo owodwa.
Ngokwakuqala ukuba iqembu le FC Platinum lifinyelele kusigaba sezibaya kumncintiswano owokudinga intshantshu zezwekazi lase Africa njalo umqeqetshi walo uNorman Mapeza uthi bona bakhangelele ukuba bafunde bathole ulwazi olokuba bedlale njani kumncintiswano ezayo.

"Besidlala leqembu eliqine kakhulu njalo elilesikhathi eside lidlala kulumncintiswano yikho ke ukunqotshwa nge 2 ka nya akuona impumela eyangisayo ngoba kudala amanye amaqembu akithi abebhaxabulwa kabuhlungu liqembu le Esperance. Okuqakathekileyo yikuba lathi sifunda okunengi ngokuphatheka kulimidlalo okululwazi esizalusebenzisa kusasa"

Iqembu le Orlando Pirates yilo elihlezi phezu kwengalane yesibaya sika Group B lilemiklomelo emine okulinani eliphethwe liqembu le Esperance lona elihlezi endaweni yesibili kusithi ele Pirates lihlezi phezulu ngoba lona lingakahlohlwa emidlalweni yalo emibili eseliyidlalile ikanti ele Esperance lihlohlwe kanye.

Iqembu le Orlando Pirates litshaye ele Horoya AC nge 3 ka nya ngoLwesihlanu ntambama.

Emdlalweni walo olandelayo iqembu le FC Platinum lizemukela ele Horoya AC kuthi ele Orlando Pirates lona lizemukela ele Esperance mhla zimbili kunyanga kaNhlolanja.

Isigaba sangezansi sezwekazi lase Africa simelwe ngamaqembu abalisa ele FC Platinum, ele Orlando Pirates kanye leqembu le Mamelodi Sundowns lona elikusibaya sika Group A njalo elihlezi endaweni yesibili engalaneni yemiklomelo lilemiklomelo emithathu.

Amanye amaqembu akusibaya sika Group A ngabalisa ele Wydad Athletic Club elase Morocco, ele Asec Mimosas elase Ivory Coast kanye lele Lobi Stars elase Nigeria njalo wonke lawamaqembu alemiklomelo emithathu iqembu ngalinye.

please wait

No media source currently available

0:00 0:02:01 0:00

Facebook Forum

XS
SM
MD
LG