Ngesikhathi isimo sezomnotho lesombusazwe eZimbabwe sesidale ukuhlupheka lokufuthelana okwesabisayo, omunye wabalwa impi yenkululeko, umnumnzana Andrew Nyathi uselobe ugwalo lwesilungu olwethesa inkokheli zikahulumende umlandu wokubangela umonakalo owesabekayo elizweni.
Lolugwalo olubhalwe ngohlobo lwemibuzo lempendulo zakhona, luchaza ukuthi kuyini okonakalayo eZimbabwe? Konakala nini? Kusoniwa ngobani lokuthi khathesi kuyini okufanele kwenziwe ukulungisa lowo monakalo? UNyathi uthi sinye isifo esihlanyelwe ngababusi esesibulele ilizwe yikwesaba.
“Sesigcwele ukwesaba. Ababusayo bayesaba. Ababuswayo bayesaba. Abaphikisayo bayesaba. Abacabanga ukuthi yibo ababusayo labo bayesaba. Wonke umuntu uyesaba. Isakhamuzi siyesaba. Isotsha liyesaba. Ipholisa liyesaba. Umuntu othela ipetrol uyesaba. Akulamuntu ongesabiyo.”
Izihloko ezikulolugwalo zigoqela Ilizwe eliziphikayo, ukulwela ukuphila embalini, ezombusazwe zesisu, inyamazana lamabala ayo, lezinye. Laphake uchaza kabanzi ukuthi ngubani owenzani, kutheni, kwasekusithini, abesephinda njalo esipha izimpendulo zaleyo mbuzo.
“Thina singabantu singakhona ukulingana. Thina singabantu singakhona ukuphilisana, sihlalisane singaba lenotho enhle, eqinileyo ephikisana lamanye amazwe. Singaba yisizwe esiqinileyo. Konke lokhu kungenzeka uma thina sonke silokuzimisela lesifiso sokwakha ilizwe.”
Lolugwalo selwemukelwe yizikhwicamfundo lozulu weZimbabwe makhaza. Unkosazana Nobuhle Aditi uluchaza njengogwalo lwempendulo.
“Sinikezwa ama ideas on what needs to be done especially kusituation yaseZimbabwe. Actual lisinikeza ihope ngoba abanengi besesikhalele sisithi akulanto esingayenza ukutshintsha isimo saseZimbabwe but lona liyasiguider ku approach yethu ukuthi imele ibenjani.”
Ngakwelakhe Icele isiphathamandla sebandla leZAPU umnumnzana Future Msebele uthi kuhle ukubona ukuthi bakhona abalwela impi yenkululeko abasacabanga njengoNyathi.
“Ibhuku leli yinto enhle kakhulu ngoba uNyathi unikeze icommunity lokhu esamfundisa khona singuZAPU. IZAPU put a lot of its time and resources investing kubaba uNyathi and lokhu akwenzayo kuhle kakhulu.”
Le yinto egcizelelwa ngunkosazana Vuyane Hlazo.
“Ibhuku leli kuhle kakhulu ukuthi liphumile. Abantu kufanele balithenge bafunde izinto abangazaziyo, lokunye okufanele bakukhangelele lokufanele bakwenze beyisizwe saseZimbabwe.”
U Andrew Nyathi uthwetshulwe yingwe eTsholotsho ngo 1953. Kwathike ngemva kokuhlukuluzwa lokubotshwa phansi kombuso wamabhunu wayaqeqetshela ezempi. Waphenduka elizweni ezokulwa phansi kwebutho leZIPRA.
Okwamanje uNyathi ngumsunguli wesikolo sezombusazwe eseZim Academy of Excellence kanti njalo ngunobhala jikelele webandla leUnited Democracy Movement. Uthi akubona elizweni lamhlanje kusenziwa zinkokheli okugoqela ukuncindezelwa kwamalungelo oluntu, ukwephulwa kwawo, ukuhlukuluzwa kwalabo abafuna ukuveza imbono yabo lemizwa yabo, akusikho ngitsho lakancane abakulwelayo.
“Lizathi likhuluma ngenhlupho liphinde likhulume ngokuthi singenzani ukuze siphume kunhlupho. So ngibona engazathi kuyadingeka ukuthi bonke abazibiza abakhokheli babelendlela yokufinyelela ukubamba ibhuku leli.”
Uthike ulethemba lokuthi inkokheli nxa zingathatha isikhathi zibala lolugwalo lwakhe, kunengi okungaguquka elizweni.