amalinks wokungena

Breaking News

Kwamukelwa Ngemibono Ehlukeneyo Ukubhubha KukaMnu. Perence Shiri


UMnu. Perence Shiri

U-Mnu. Perrence Shiri, obengumpathintambo wezokulima kuhulumende weZimbabwe akasekho. Embikweni wendunduzo uMongameli Emmerson Mnangagwa uncome umuyi esithi ibandla lakhe leZanu PF kanye lelizwe lonke lihlakelwe liqhawe lamaqhawe.

Kulemibiko yokuthi angabe ebulewe yiCovid-19 njengoba umtshayeli wakhe ebulewe yiyo kunsukwana ezisanda kwedlula, kodwa uMnangagwa kanye leziphathamandla zonke zikahulumende azivezi ukuba udliwe yini.

Emazwini akhe wokwazisa ngemfa kaShiri, ngaphambilini kokungena umhlangano we Politiburo webandla lakhe leZanu PF, uMnangagwa uthi ilizwe kanye lebandla lakhe balahlekelwe kakhulu.

“Ngiyalemukela kulomhlangano we Polituburo, sihlangana nje silokudana okukhulu ngemva kokuba silahlekelwe ngomunye wethu obelilunga le Politiburo njalo wayengumphathintambo wezokulima, uAir Chief Marshal Retired Prence Shiri. Ukubhubha kwakhe kusethuse kakhulu thina sonke. Kungakho sithi makalale ngoxolo.”

Umnumzana Victor Dube isakhamuzi semzini weBudiriro eHarare uthi lanxa elusizi ngokubhubha kukaShiri, abanengi bazomkhumbula ngesihluku esehlela izigaba zeMaNdebeleni leNkabazwe lapho okwabulawa abanengi liviyo lebutho ele Fifth Brigade elalikhokhelwa nguye kumbuqhazwe weGukurahundi.

“Silokudana okukhulu sithi kalale ngokuthula undoda lowu. Kodwa thina abe Matebeleland sisasebuhlungu kakhulu ngoba wakhokhela ibutho elenza ulunya kuzihlobo zethu, wabulala abantu abanengi. Ngibona khonale lapho aya khona ezulwini bazambuza ke bona ababulawayo, izihlobo zethu ukuthi kanti wena wasibulalelani?. Nga waxolisa sakuzwisisa. Kodwa ke hayi, thina njengabantu bakaNkulunkulu, sithi kalale ngokuthula. ”

Okusekelwe langesinye njalo isakhamuzi seHarare umnumzana Irvin Takavada, omunye wabaphatheke kumikhankaso yokulwela ilungelo loluntu phansi kwenhlanganiso ye Occupy Africa Unity Square. UTakavada uthi okudanisayo yikuba ubengomunye wabakade bengazihluphi ukulungisisa inkinga odokotela labongi abakhala ngazo ngoba ubezitshela ukuba uzakuyakwelatshwa kwamanye amazwe engakwazi ukuba umhlaba wonke uzobhekana leCovid 19 abamazwe bavale imingcele yabo.

“Bebethembele kweleChina kodwa elechina livalile imingcele yalo, ngapha ngase South Africa akuthembisi lakho, libhekane lenkinga zalo lalo ele South Africa. Besekuthenjwe zona lezi izibhedlela zelizweni zona abakade bengazinakekeli. Khathesi sebebhekane lenkinga labo. Osekukhona yikuba bayengcwatsha nje njengoba kungela lutho kulezi zibhedlela. Bebengakulindele lokho osekusenzakala njalo bebekhohlwa ukuba yibo asebebadala kakhulu njalo bebuthakathaka. ”

Isikhulumeli seZapu, umnumzana Iphithule Maphosa uthi kayisiyo yonke imfa elizweni eyikulahlekelwa ebantwini kumbe elizweni njengayonale eka Perence Shiri.

“Okuyilo icala alikhokhelayo, ekhokhela ibutho leFifth Brigade ezibiza ngoJesu omnyama onguye ophethe imbodlela ye oxygene, elawula ukuthi ofayo ngubani, ophilayo ngubani. Sibone ukulahlekelwa yimpilo, sibone omama bedlwendulwa. Sibone abanye bevulwa izisu, kusiwa inkonyane zabo phansi kuyikuthi badinga ama dissidents. Kunengi ukuhlukuluzwa okwayenziwayo kukhokhelwa ngubaba lowu u Perence Shiri. Yiyo ilegacy ayitshiyayo, yikho esimkhumbula ngakho njengabantu beMatebeleland le Midlands leZimbabwe jikelele, ukubulala lokuhlukumeza okungela mkhawulo.

Abebandla lakhe kanye lozulu weMaNdebeleni leNkabazwe u Maphosa uthi bazohlala bemkhumbula ngendaba ze Gukurahundi uShiri.

“Njalo indaba yeGukurahundi kayiphelanga, kayilungiswanga ngoba babelokhu bephethe umbuso, laye usebalekile engalungisanga leyo ndaba. Bathembe khona ukuthi bazafa bephele kodwa hayi akunjalo, icala kaliboli, lizafika ilanga lokuthi kulungiswe. Bakhona abafelokazi babo, bakhona abantwababo, yibo abazaphendula imibuzo njengoba lathi sizakufa siyitshiye, siyitshiyele abantwabethu, siyitshiyele abazukulu bethu, izalungiswa kuphela. Akekho odala icala libole kumbe liphele linjalo lingalungiswanga. ”

Ukubhubha kukaShiri eseleminyaka engamatshumi ayisithupha lanhlanu yokuzalwa – 65, kuza ngemva kokuba amalunga edale lephalamende ambalwa etholakakale eleCovid 19 kanye lozulu kumankampani atshiyeneyo anjengemsakazweni owe Zimbabwe Broadcasting Corporation lapho okutholakale isisebenzi silalo ePockets Hill, ehle yavalwa ukuze kufafazwe imithi.

Akukaziwa ukuthi uzobekwa nini njalo ngaphi njengoba uMnangagwa ephelele ekuthini yikhona kuzohlelwa ngomngcwabo wakhe.

Facebook Forum

XS
SM
MD
LG