Odokotela abangamalunga enhlanganiso yeZimbabwe Hospital Doctors' Association (ZHDA) abase Harare bamanyane labakoBulwayo ekutshengiseleni esibhedlela seParirenyatwa ngoLwesihlanu bekhala ngodaba lweholo eliphansi.
Bakwenze lokhu ngenjongo yokukhumbuza iziphathamandla zikahulumende ukuba zilungisise okubenza bakhalale umsebenzi. Bemba phansi bethi kababuyeli emsebenzini kuze kulungisiswe abakhala ngakho njalo besithi kabethuswa nguhulumende othi uzobathathela amanyathelo alukhuni nxa bengasabuyelanga emsebenzini.
Bezigcwele usizi ingoma ebezihlatshelwa ngodokotela laba abavele ezibhedlela ezehlukeneyo, lapho betshengisela esibhedlela se Parirenyatwa Group of Hospitals, phambi kwehofisi yenhlanganiso yeHealth Services Board of Zimbabwe.
Bathi bakhathele ngohulumende ombaxa mbili,okhuluma okunye kibo abuye ayekhuluma okwehlukile lapho esekhulumisana lentathelizindaba.
Isikhulumeli seZHDA njalo ongumsekelo womkhokheli wenhlanganiso le, uDr. Mxolisi Ngwenya, uthi akaboni okuzabenza ukuthi babuyele emsebenzini ngaphandle kokuthi uhulumende alungise izikhalazo zabo.
UDr. Patrick Mugoni, omunye wabaphatheke kulokhu kutshengisela, uthe isimo sezibhedlela sizwisa ubuhlungu umuntu wonke elizweni.
Esinye seziphathamandla zenhlanganiso ebona ngamalungelo yabakumsebenzi wezempilakahle eye Zimbabwe Association for Doctors for Human Rights – ZADHR u Dr Sikhululi Ngwenya, uthi bakhathazekile ngokwenza kukahulumende olokhe edonsa inyawo engalulungisisi udaba lwabodokotela lolu.
Ukhuthaza uhulumende u Dr Ngwenya, ukuba alulungisise ngokushesha loludaba, odokotela babuyele emsebenzini basize uzulu.
Lokhu kukhalala umsebenzi kwabodokotela sekungene kusuku lwesimatshumi mabili lantathu ( 23 days ) selokhu baqalayo.
Ngesikhathi loludaba lulotshwa, bebelokhe bephakathi komhlangano wokukhulumisana leziphathamandla zikahulumende, ukubonisana phezu kokungenziwa.
