Abenhlanganiso yabodokotela eyeZimbabwe Medical Association bakhuthaza ab Premier Medical Aid Society ukuba kumele bahlawule odokotela indleko yezigulane ezingamalunga ayo.
AbePSAMS bakhuthazwe njalo ukulandela isilinaniso semali eyavunyelanwa lenhlanganiso ye Association of Healthcare Funders of Zimbabwe.
Odokotela beZIMA baveze lokhu emhlanganweni lentathelizindaba owenzelwe emahofisini abo wokwazisa ngesimo kundaba yokungahlawulwa lapho belaphe amalunga awe Premier Medical Aid Association.
Unobhala jikelele weZIMA, uDR Sacrifice Chirisa obekhanya ethukuthele uthi okudanisayo yikuba, okwenziwa ngabe PSMAS sekubeka impilakahle yamalunga ayo engozini.
“Lapha sikhuluma ngezigidi ezingamatshumi ayisithupha(60 million), okuyimali okumele abe PSMAS bayihlawulele. Abanye bama Medical Aid laba banganeno, basaselezikwelede. Kodwa inkinga yikuthi kabahlawuli ngesikhathi esabekwayo, thina sithi kasihloniphe lezo zikhathi ezabekwayo zokuhlawulela lezi mali. Iqiniso yikuba singake sakwamukela ukuthi leso sikhathi sesidonsa kuze kuyekuba zinyanga eziyisikhombisa.”
Umgcinisihlalo wezokulonda inhlawulo kunhlanganiso zama Medical Aid, uDr Shingirirai Meki ulandisa ngengozi ekhona kulabo abadinga usizo kubodokotela nxa amankampani ama Medical Aid lawo abangamalunga kiwo esesehluleka ukuhlawulela indleko zabo njangalokho okwenziwa ngabe PSMAS.
“Abantu abagijimela ezibhedlela zikahulumende sebesiba banengi kakulu ngoba bengasanelisi ukuyakwelatshwa kubodokotela abasebenza bezimele. Isizatho yisonaleso sokuba besala belezikwelede.
Nxa abe Medical Aid besehluleka ukukubhadala wena dokotela awungeke wavuma ukwelapha lowo oyisebenzisayo usazi mhlophe ukuthi awusoze wathola lutho ngoba lawe ulendleko zakho.
Nxa sekuthiwa hlawulelani lezo zikwelede sekungani silolunya kuzulu. Thina sithi makuhlawulelwe kulandelwa lokho esakuvumelanayo.”
Esinye sezakhamuzi seHarare uMnu Charles Nyoni uveze ukukhathazeka ngesimo sokungahlawulwa kwabodokethela.
“Yinto ecaphulayo ngoba mina ngibanjelwa imali every month, ngingahola i medical Aid ithatha imali yayo, ukuthi ngigulile kumbe kangigulanga kabalani lakho. Sengifuna ukuyakwelatshwa sekuthiwa i Medical Aid yami kayikhokhi imali, kuyabe kuvela ngaphi mina ngibanjelwa imali. Sicela nje ukuthi uhulumende akhangele udaba lolu, alukhangelisise ngoba uzulu nje kathabanga ngakho.”
Ukhuthaza iziphathamandla zezempilakahle ukuba zike ziyikhangelisise lindaba ngoba izophazamisa impilakahle yabantu beZimbabwe.
Lokho kutshengisa ukuthi vele ama Medical Aid Society la kalandaba la mamembers abo njalo kalandaba lokuthi thina esiphila lokusebenza kanzima sikhokha kanjani le imali abayabe befuna ukuthi siyibhadale njalo abasibambela yona.
Yinto engalunganga nje leyo, yinto nje etshengisa ububi abamankampani alapha eZimbabwe njalo lokuthi umthetho uyakuvumele lokho ukuthi kwenzakale.
Isakhamuzi sakoBulawayo umnumzana Collins Ncube uthi uyabubona ubunzima obubhekane labodokothela labe ZIMA.
“Okuqakathekileyo yikuthi khona abantu abe Premier Medical Aid Society babekwazi ukuthi uzulu nguye obhadala imali ye Medical Aid ukuthi bathole usizo oluvela kubodokotela bethu. Nxa bengasabhadali odokotela kodwa thina sibhadala kibo ukuthi sithole usizo kubodokotela, angikholwa ukuthi kungahamba kuhle khonalokho ngoba khathesi abanye odokotela bathi kabasayithathi i PSMAS nxa ule Medical Aid ye PSMAS bayakutshela ukuthi asithathi I PSMAS, sizakwenza i consultation kuphela, okunye lokhu suzamele uzibhadalele nge cash. So khonokho kutshengisela ukuthi khona kulobusela obukhulu obenzakalayo.”
U Ncube uthi kumele luhlolisiswe loludaba kudingisiswe okuyikho okwenzakalayo kilo.
“Nxa sibhadala thina bayakhweza anytime nxa sekumele ukuthi babhadale labo abasisizayo bakhona, ngoba bona bayi bridge nje kuphela ukuthi sifinyelele kubodokotela otherwise akusancedi njengomuntu ukuthi ngibhadale khathesi I Medical Aid ngithi ngingale u dokotela angitshele ukuthi top up with this ngoba abantu laba ababhadalanga. Labodokotela sebebazi, sekungcono ukuthi bazihlalele nje bengenzi lutho kodwa thina siyabe sibhadala inyanga zonke.”
Imizamo yokukhulumisana lomkhokheli wenhlanganiso eye Premier Service Medical Aid Society – PSMAS u Dr Farai Muchena yehlule njengoba ubengalusabeli ucingo lwakhe lukamakhalekhukhwini.
Abe ZIMA bakhuthaza njalo abenhlanganiso yeZimbabwe Anti – Corruption Commission ukuba baqhube inhlolisiso kundlela imali ezisetshenziswa ngayo kunhlanganiso lamankampani kahulumende eye Audit.
