Omama baseNjelele eMatopo sebenqume ukubeka inyanga yonke kaNtulikazi ukuba ibe ngeyokukhumbula umuyi owayengumsekeli kamongameli, uDr Joshua Nkomo ebhalwini ayehlala kilo uma ezokhulumisana lenkokheli zomdabu mayelana lempi yenkululeko kunye lokucela izulu engakayi elitsheni.
Ekhuluma emshasheni weNjelele ngemva kokunanza ilanga lokukhumbula umuyi uNkomo, inina elalipheka utshwala uma umuyi ezobika ngempi yenkululeko lokucela izulu, uNkosikazi Ledi Ncube uthi bayamkhumbula umuyi ngalesi sikhathi.
UNkosikazi Ncube uthi wafunda okunengi ngesikhathi epheka utshwala bukamuyi ngensuku eze emshasheni njalo ufisa ukuba kubeyindawo ethuthukiswayo.
UNkosikazi Angeline Moyo uchaze ukuba uMshasha eNjelele akusindawo yokudlala ngoba yacandwa ngumuyi elenjongo yokuyithuthukisa njalo isiko wayeliqakathekisa kakhulu.
Wathi impi yeGukurahundi yiyo eyaphazamisa intuthuko yalindawo kodwa balesifiso sokufeza umbono kamuyi wokwakha amabhizimisi eNjelele.
Umuyi uchazwe njengomuntu owayethanda amasiko njalo uNkosikazi Leonora Ncube uchasise kabanzi ngalokhu.
Izakhamizi ezinengi zeNjelele zibike ukuba umuyi bayamkhumbula loma kulobunzima ezweni. UNkosikazi Siduduzile Nyathi uchaze ukuba ngesikhathi ebona umuyi wayesasemncane kodwa kungathi kuyizolo.
UNkosikazi Cingilizwe Tshuma yena uthi bayadana ngoba kulabantu asebaphambanisa bathatha izitsha ezazisetshenziswa ekuthetheleni.
UNkosikazi Tshuma ubike ukuba uyafisa ukuba umbono kamuyi ungcwaliswe.
UNkosikazi Sethi Ngwenya yena uthi uNkomo wayengumuntu olomusa kakhulu njalo watshiya ebacandele umshasha ukuba bazithuthukise.
lzakhamizi zeNjelele zithi lokhe Nkomo wakhothamayo izulu lahle lanyamalala. Okugcizelelwe nguNkosikazi Elizabeth Sibanda.
UNkosikazi Sizalobuhle Ncube uchaze ukuba uNkomo wayezisa leZinduna ezinengi njalo wayehlonipha amasiko kodwa izifiso zakhe lokhe zingakaphumeleli kuyamdanisa.
Omama beNjelele basukume ngobunengi ukuza emkhosini wokukhumbula umuyi bethi noma kunzima kangakanani ezweni bazahlala bemkhumbula nomanje engaphiwa inhlonipho abayikhangeleleyo ngoba akula langa elicacileyo elabekwayo elokumbhumbula kodwa bona njengesigaba inyanga kaNtulikazi yiyo abazipha yona ukumkhumbula.
UNkomo wazalwa ngoNhlangula 17, 1918 eSemokwe wakhothama ngoNtulikazi 4, 1999. Udume ngokuba ngubaba welizwe yikho abantu babembiza Father Zimbabwe ngoba wayengakhethi mhlobo njalo wazinikela ngempela ukukhulula ilizwe nomanje umbuso okhona manje wawusumzingela emini lebusuku, waze wacina ekhumisana lawo umlotha kulotshwa isivumelwano sokumanyana esebone uzulu weMandebeleni esethwele luklubhu.
