Umlobi osakhulayo kwezokubhala izingwalo, uMnu. Zenzele Nkomo, useyethule ugwalo olulezinkondlo ezilikhulu lamatshumi amabili ngolimi lweSiNdebele.
UNkomo uthi inhloso yikuthi ulimi lweSindebele lunganyamalali loba abadala bengasekho.
“Yimi uZenzele Nkomo MMM, ozalwa eKezi eMaphisa esigodini sengwe emnyama. Ngazalwa khona ngayakhulela esigodlweni sakoBulawayo, ngaya ngayafunda entabeni zaseFounders. Ngaphiwa ngaphansi kwamakhala ngabuya ngaphiwa ngaphansi kwenwele. Angibolekwanga kube ngabolekwa kube sebethatha abalomona.”
Lumlobi osacathulayo kwezokubhala izingwalo uthi ubufakazi bokuthi ulimi lweSindebele olujulileyo luya lulokhu lunyamamalala ikakhulu entsheni, yiso isizatho esimenze abhale linqwaba yenkondlo.
Lezi inkondlo akuzange kube ngovuka ngikhona okotshwala besikhaphekhaphe kodwa luhambo oluqale ngo 1996 uNkomo esafinyela esihlathini.
“Isihloko sithi sivusa olwenkaba. Sivuselela ulimi lwethu, sibuyisela ulimi lwethu kusizukulwana esikhona lesizayo ukuze lungatshabalali. Lulenkondlo ezingu 120 ezibhalwe yimi uZenzele Nkomo ngiyi 1, kungela omunye umuntu engilaye.”
UNkomo uthi lolugwalo olungumkhombandlela wempilo kodwa olubhlwe ngolimi olunambitha impela. Kukho konke lokhu uthi yinye kuphela injongo, ukuvuselela ulimi alwenze lukhwabithwe yintsha ukuze lungatshabalali kusasa.
Zehlukile ngolimi lenjongo inkondlo zakhe. Zikhona ezalabo abasemathandweni, kube lezezitha, kunakwe abafelweyo, kungenwe kwezombusazwe kanti labathabe bedlulisa labo balesabelo kulolugwalo.
Ikhonake enye yezothando lapho achothoza khona amantombazana angamabele endlela.
Banengike abathanda ulimi lwesintu abawuncomayo umsebenzi kaNkomo ikakhulu nxa ku khangelwa ukuthi inengi lentanga yakhe sebekhetha ukwaziwa ngokusikhipha ngamakhala isikhiwa kulokwazi olwabo ulimi.
UMnumnzana Alton Sibanda uthi into engagcina ulimi luphila yikusekelwa kwabalobi abafana loNkomo.
“Ngilethemba wonke umuntu osedlule kulololugwalo walufunda, ufunde kabanzi. Lengane zingafunda kabanzi kilo. Labadala bangafunda kakhulu kilo, muhle umsebenzi owenziwe nguNkomo.”
UNkomo uthi okwamanje uphakathi kokudinga indlela yokuthi ugwalo lwakhe lufinyelele ingane ezisesikolweni eZimbabwe. Ufuna njalo lamankampani ezingwalo angamsiza ukuthi lolugwalo lufinyelele endaweni zonke zelizwe.
