amalinks wokungena

Breaking News

Osomabizimusi Babanjwa Ngamandla Ukuthenga Imfanekiso KaMongameli Mugabe


Osomabhizimusi be Harare abase Market Square kanye lemkambo we Gulf Complex bakhala ngokuthi babanjwa ngamandla ngabalandeli bebandla le Zanu PF ukuthi bathenge imfanekiso kaMongameli Robert Mugabe okumele bayifake kumabhizimusi abo endaweni ebonwa ngumuntu wonke. Osomabhizimusi laba bathi abalandeli bebandla leli abangaba ngamatshumi amahlanu bagombolozele indawo lezi bababamba ngamandla ukuthi bathenge imfanekiso le ekade ibiza amadola angamatshumi ayisithupha eMelika - $60 owodwa.

Bathe abalandeli bebandla le Zanu PF bathengise imfanekiso le ngamandla besithi kumele bahloniphe umbuso kaMugabe. Isikhulumeli sebandla le Zanu PF uMnu Rugare Gumbo sitshele u Gibbs Dube we Studio 7 ukuthi kalaqiniso lokuthi abathengisa imfanekiso le ngabalandeli bebandla lakhe.

Ingcwethi kwezenotho uMnu. Masimba Kuchera uthi ibandla le Zanu PF lithengisa imfanekiso le ukwenzela ukudinga imali yokukhankasela ukhetho oluzayo.

Kunjalo nje, lanxa kwamanye amadolobho abantu bengakaqali ukubanjwa ngamandla ukuthenga imfanekiso kaMugabe abanye bathi loluhlelo lulakho ukuqheliswa ilizwe lonke jikelele. Ukuhlaziya loludaba uChris Gande owe Studio 7 uxoxe lengcwethi ecubungula ezombusazwe u Alderman Charles Mpofu endawonye lesiphathamandla secele leMDC elikhokhelwa nguMnu. Welshman Ncube, uMnu. Edwin Ndlovu.


XS
SM
MD
LG