Uhulumende weZimbabwe ukhangelele ukuma ukwabela abantu ukudla ngoMbimbitho lonyaka njengoba inengi elilimileyo lonyaka selizaqalisa ukuvuna.
IZimbabwe ibibhekane lendlala emangalisayo ngenxa yokungani kuhle kwezulu okweminyaka emibili ilandelana.
Lokhu kubangele ukuthi kuqhutshwe uhlelo lokwabela uzulu ukudla okunjengempuphu lamafutha okupheka.
Abantu abatshiyeneyo bathi uhlelo lolu kaluqhutshwa ngemfanelo ngoba ukudla kunikwa labo abasekela ibandla elibusayo elika Mongameli Robert Mugabe.
Ukungabiwa kahle kokudla kwabaswelayo kubangele ukuba iKhomishini ebona ngamalungelo oluntu, iZimbabwe Human Rights Commission, ingenele ikhuze uhulumende kwabalobubelo kwezinye indawo.
Emadolobheni lemaphandleni abantu baphinda batholiswa inhlanyelo lemvundiso yefertiliser lakho okwakuphiwa ngenkethabetshabi.
Uhlelo lokupha abantu ukudla lukhangelele ukuphela ngoMbimbitho ngesikhathi lenkokheli yomdabu ikhonona ngendlela oluqhutshwa ngalo.
USobhuku kaWard 11 eMzingwane, uMnu. Thomas Ngwenya, uthe ulemizi efika ikhulu ekade inikwa ukudla ngakho akwaziwa ukuthi kuzakwenziwani ngalabo abalambayo nxa uhlelo lolu lungamiswa.
USobhuku weNswane eMatopo, uMnunzana Manager Sibanda, laye usole kakhulu ezinye inkokheli zomdabu eziphatheka kwezombusazwe esithi zibangela ukuba abantu babo balambe kucine kulokungazwani.
Omunye njalo usobhuku, uNkosikazi Magaret Moyo, uthe inkokheli zomdabu aziyeke umkhuba omubi olakho ukuletha ubuyanga elizweni.
Isakhamuzi uNkosikazi Patience Dlamini ubonge induna uKillion Masuku ngokuza esigabeni sakhe wathi mhlawumbe inkokheli zomdabu zizaba lamahloni zabele abantu ukudla ngendlela eqondileyo.
Induna uMasuku ukhuthaze abantu ukuba bangalweli ukudla okuvele kubuya kubolile njalo abangazi ukuba kuvela kuphi nanko uhlelo solufika emaphethelweni kodwa lutshiye inzondano ngenxa yabantu abangamagovu.
Kusenjalo, ibandla leZAPU ezansi yeMaNdebeleni selobophisa abantu abahamba bethatha amadola amabili ezakhamizini kuthi sokufika isikhathi sokuphiwa ukudla beqiwe.
IZAPU ithe labo abathethe imali yabantu abazibisele.
