amalinks wokungena

Breaking News

Owayengumkhokheli weLibya, uMnu Gadhafi Kasekho


Owayengumkhokheli weleLibya uMnu Moammar Gadhafi kasekho.

UGadhafi udutshulwe wafa ngoLwesine ngabalweli beNational Transitional Council edolobheni leSirte, lapho ekade ecatshe khona kulandela ukugenqulwa kombuso wakhe.

Omabonakude abasakaza emhlabeni jikelele baveze imifanekiso yesidumbu sakhe sigeleza igazi. Eminye imbiko ithi uGhadafi ubulawe ngamabhomba ajikwe zindizamtshina zamabutho eNato.

Kodwa inhloko kahulumende weLibya uMahmoud Jibril uthe uGadhafi ubulewe ngabalweli beNTC ekuhlaseleni kwabo idolobho leSirte ebelilokhu lisezandleni zikaGadhafi.

Unobhala jikelele weUnited Nations uMnu Ban Ki-moon uthe imfa kaGadhafi yinto ejabulisayo ngoba kusipha iLibya ithuba lokulungisisa konke okuhluphayo okugoqela ukuqeda impi.

UMnu Gadhafi ufe eseleminyaka engamatshumi phose ayisikhombisa (69). Ekitshwa embusweni kunyanga ezedluleyo ubeseleminyaka engamatshumi amane lambili (42) ephethe intambo zombuso kweleLibya.

Abantu beLibya bahlamukele uGadhafi ngemva kokuba kube lemvukela efanayo kweleEgypt laseTunisia.

Kodwa uGhadafi uzame ukuqeda lumvukela ngokubulala abantu, okuyinto enze iUnited Nations yavumela iNato ukuba ingene kweleLibya ibhombe indawo uGhadafi agcine khona izikhali ebezisetshenziswa ngamabutho akhe ukubulala abantu.

Lokhu kuphe abahlamuki idlabuzane elikhulu, bahlasela baze bagenqula umbuso wakhe.

Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi imfa kaGadhafi ayimangalisi ngoba kunguye owaqalayo ukubulala abantu beLibya ekuqaleni komvukela.

Kodwa umkhokheli weZanu PF edale lephalamende uMnu Joram Gumbo uthi ukufa kukaMnu Gadhafi kuyadanisa. Uthe njalo usola umanyano weAfrican Union ngokwehluleka ukulungisa udaba lweLibya, okucine kubangela ukungenela kweNato.

XS
SM
MD
LG