amalinks wokungena

Breaking News

Owe Zimbabwe Owabulala Ilunga Ledale Lephalamende yeBotswana Walelwa iBail


Abantu bageziswa inyawo emgceleni welizwe leBotswana leZimbabwe ukwenqabela umkhuhlane wamasondo kwele Botswana.

Isizalwane seZimbabwe esetheswa umlandu wokubulala ilunga ledale lephalamende lakweleBotswana, sizathonisiswa icala lisesitokisini ngemva kokwesulwa kwamaphepha akhe okuhlala lokusebenza kweleBotswana.

U Jabulani Dube wetheswa icala lokubulala umnunzana Isaac Davids obelilunga ledale lephalamende engowebandla elibusayo.

Umthethwandaba waphezulu oweHigh Court eGaborone uthi oweZimbabwe, uJabulani Dube uzathonisiswa icala lakhe esesitokisini.

UDube lomunye oweBotswana, uMokgalemi Maleya, betheswa umlandu wokubulala ilunga ledale lephalamande, umnunzana Isaac Davids ngoZibandlela lonyaka.

Ababili laba babesebenzela uDavids epulazini lakhe, njalo babikwa bamgwaza ngengqamu kulandela ingxabano eyaqhamuka phakathi kwabo bobathathu.

UDube wahle wesulelwa incwadi zokuhlala lokusebenza eBotswana kulandela ukubotshwa kwakhe.

Unkosikazi ka Davids nguye owacela ukuthi incwadi zikaNgwenya ziyesulwe, ngoba engafisi ukuthi aqhubeke ezisebenzisa.

Ukwesulwa kwencwadi zikaNgwenya kutsho ukuthi angeke acele ukuthi icala lakhe lithoniswe engaphandle kwesitokisi, ibail, ngoba umthethwandaba usithi ulakho ukubaleka.

Iqgqethwa elimela ababili laba, umnunzana Sesupo Masaka licelele uMaleya ukuthi akhitshwe esitokisini, athonisiswe ephandle, okwavunywa ngumahluli, uOmphemetse Motumise.

Abatshutshisi abazange baphikise ukuthi uMaleya athoniswe engaphandle, kukanti uDube, kulandela ukwesulwa kwencwadi zakhe, kazange azame ukudinga imvumo yokuthi ahalule imali yesibambiso eyebail.

Udaba lukaDube lujayelekile kwabanengi abeZimbabwe abasebenza emapulazini, abanye besithi baphathwa ngocuku, abanye bengahlawulwa okucina kudala ingxabano.

"Zinengi indaba esizizwa emaphepheni ikakhulu ngesiphatho kanye lesimo emapulazini. Uyakwazi ukuthi inengi elisebenza khona ngabe Zimbabwe, ngoba yiyo imsebenzi etholakala kalula njalo abeBotswana bengakhwabithi ukuyithatha. Ngakho indaba zokufuthelana emapulazini zivamile," kutsho uDube.

Udaba oluvamile olokuphathwa ngocuku emapulazini ngoluka mnunzana Gift Ncube yena owasala engelazandla ngemva kokudutshulwa ngowaye mqatshile ngesikhathi ethonisa inhlawulo yakhe.

Kudaba luka Dube, kubikwa uDavids, wayefuna ukuyathatha umbobho emoteni, ngemva kwengxabano, phezu kokuthi kungani ethole uDube kanye loMaleya bengekho epulazini, beyephuza utshwala.

please wait

No media source currently available

0:00 0:02:17 0:00

Facebook Forum

XS
SM
MD
LG