Abebhanga elikhulu lelizwe el Reserve Bank of Zimbabwe bathi akula abakuphambanisayo ngokusebenzisa amabhiliyoni amathathu amadollar - $3 billion ekusekeleni uhlelo lokulima olweCommand and Presidential Input Scheme ngomnyaka ka2017 langomnyaka ka2018 besithi bakwenze phansi kweziqondiso zikahulumende lanxa bengatholanga imvumo edale lephalamende.
Umgcinisihlalo wekhomidi yedale lephalamende ebona ngezemali eyePublic Accounts, uMnu. Tendai Biti, uthi lokhu kwakungekho emthethweni.
Kodwa usibalukhulu weRBZ uvike ngelokuthi lokho kungumlandu wabogatsha lwezemali.
Ingcwethi ecubungula ezombusazwe ekunhlanganiso yeZimbabwe Democracy Institute, uMnu. Bekezela Gumbo, uthi akumangalisi okwenziwa nguhulumende kaMongameli Emmerson Mnangagwa.
UGumbo uqhubeka esithi konke lokhu osekusenzakala, yisibonelo sokuthi ilizwe selibuswa ngabakubutho.
Abe khomidhi le bethule impumela yakuqala yophenyo lwabo abalwenze bekhangela indlela abebhanga likahulumende eleRBZ, ebeliqhuba ngalo umsebenzi kwezokusetshenziswa kwemali.