NgoLwesithathu umthethwandaba waphezulu owe Constitutional Court ulahlele khatshana udaba luka Mnumzana Promise Mkhwananzi, umkhokheli inhlanganiso yeTajamuka-Sesijikile Campaign, alukhweze ecela idale ukuthi libambe ngamandla uMongameli Robert Mugabe ukuba atshiye isikhundla akiso njalo athoniswe amacala akhe okwephula amalungelo oluntu.
UMnumzana Gift Siziba, omunye wabakhokheli benhlanganiso yeTajamuka-Sesijikile koBulawayo, uthe umthethwandaba waphezulu owe Constitutional Court, ulahle udaba luka Mnumzana Promise Mkhwananzi, usithi akalabufakazi obeneleyo obungenza ukuthi leli libe licala ngempela elingathonisiswa umongameli welizwe ngalo.
USiziba uqhubeke esithi uMugabe uhlala ethethisa abakhuluma imbono eyehlukene leyakhe okugoqela abenhlanganiso yeTajamuka-Sisijikile.
Esephatha udaba lwesinqumo esithethwe ngumahluli weConstitutional Court sokulahla loludaba, uSiziba uthe basemukele ngokudana okukhulu ngoba akula ongakwaziyo ukuthi uMugabe wephula ilungelo likazulu weZimbabwe.
Uphinde wathi ingcwethi ezibona ngezemithetho eZimbabwe abasebenzela inhlanganiso ezizimeleyo ezifana leyamagqwetha eye Zimbabwe Lawyers Human Rights sebefakile esinye isicelo emthethwandaba oweHigh Court, ukuze bayikhangele okwesibili lindaba.
Kunjalo nje, uMfundisi Evan Mawarire unikezwe imvumo ngumahluli womthethwandaba weHigh Court, uJustice Clement Phiri sokuthi aphiwe ithuba lokuhlawula imali yesibambiso se bail, samakhulu amathathu amadola- $300.
Phezu kwalokho uMawarire kuzamele anikeze amapholisa awe Avondale Police Station eHarare ugwalo lwakhe lokuhambisa ipassport njalo kumele ayezibonisa emapholiseni manye kabili ngeviki.
