amalinks wokungena

Breaking News

Rahman Gumbo: Sesifikile Isikhathi Sokutshaya Kuzwele


Iqhubekela phambili imidlalo yePSL

Umqeqetshi weqembu lenguqu ele Chicken Inn uRahman Gumbo uthi sekuyisikhathi sokukhetha indlubu ewele ephokweni kumkhankaso wokuphakamisa isicoco kusigaba se Castle Premier Soccer League.

League itshiye iqembu le Ngezi Platinum Stars lihlezi phezu kwengalane lilemiklomelo engamatshumi amathathu lesikhombisa ngoba kokutshaya elikwenze ele Hwange nge 4 ka 1 ngeSonto.

Endaweni yesibili kuleqembu le FC Platinum lona elilemiklomelo engamatshumi amathathu lanhlanu njalo elinqobe ele Bantu Rovers nge 1 ka nya ngoMgqibelo.

Iqembu le FC Platinum lilingene ngemiklomelo leqembu elihlezi endaweni yesibili ele Chicken Inn lona elinqobe ele Bulawayo City nge 1 ka nya ngeSonto.

Umqeqetshi weqembu le Chicken Inn uRahman Gumbo utshele intathelizindaba zemidlalo ukuba sekuyisikhathi esokuba kucace ukuba yini ethatha indawo engalaneni yemiklomelo njengoba imidlalo isingene kungxenye yesibili eyesizini.

“Ihlandla lesibili elemidlalo yisikhathi esokuba kubonakale lapho okuyawela khona induku loxakuxaku. Ukuthola imiklomelo emithathu sekuyinto eqakathekileyo kakhulu kuloba yiliphi iqembu.”

Endaweni yesine kuhlezi iqembu le Dynamos lona elinqobe ele Triangle nge 2 ka 1 njalo lilemiklomelo engamatshumi amathathu lantathu okulinani eliphethwe liqembu le How Mine lona elibe ngutshiki lobhanqa 1 ka 1 lele Tsholotsho.

Iqembu le Black Rhinos lihlezi endaweni yesithupha lilemiklomelo engamatshumi amathathu lanye okulinani eliphethwe liqembu le Highlanders lona elinqobe ele Shabanie Mine nge 2 ka nya.

Ngaphansi kwengalane iqembu le Tsholotsho yilo elilokhu lijeke amanye amaqembu lilemiklomelo eyisikhombisa kuthi phezu kwalo kuleqembu le Bantu Rovers elilemiklomelo eyithoba munwe munye.

Endaweni yesithathu nxa usuka ngaphansi kuleqembu le CAPS United elilemiklomelo elitshumi lane kuthi phezu kwalo kuleqembu le Hwange elilemiklomelo elitshumi lesikhombisa.

Iqembu le CAPS United liqhuba nzima selokhu liphelelwe ngumphako kumncintiswano wokudinga intshantshu zezwekazi lase Africa kodwa lidlale imidlalo emilutshwane kulamanye amaqembu njengoba lona lilemidlalo elitshumi lambili.

Facebook Forum

XS
SM
MD
LG