Ingcwethi ezicubungula ezombusazwe zithi uhambo lomphathintambo wobudlelwano beRussia lamanye amazwe kuveza ukuba ubudlelwano beZimbabwe leleRussia lulakho ukuqiniswa ikakhulu emsebenzini wezokusungulwa kwamabhizimisi.
Kodwa zithi kumele ele Zimbabwe liqaphele ngoba eleRussia lingabe lidinga okunengi kulelolizwe okwedlula ezamabhizimusi.
UMnu. Sergie Lavrov ngoLwesine wenze umhlangano loMongameli Emmerson Mnangagwa lomunye wakhe obona ngobudlelwano beZimbabwe lamanye amazwe, uMnu Sibusiso Moyo.
Ekhuluma lentathelizindaba, uMnu Lavrov uthe ilizwe lakhe kalilani lokuthi ngubani obusayo kodwa liqakathekisa ukuqhuba ibhizimisi leleZimbabwe.
Ilizwe leRussia libikwa libhekise amehlo emsebenzini wezokwemba kodwa abanengi bakhala ngendlela izivumelwani lezi ezinziwa ngazo kungela kucaca.
Ingcitshi kwezombusazwe, uMnu Pride Mkono, uthe ilizwe leZimbabwe kumele licace ukuthi lifunani nxa lizaqinisa ubudlelwano lele Russia lona athi lingeza lijonge ukuzohuquluza inotho kuphela okungasoze kuncede ilizwe.
Ukuza kuka Lavrov elizweni le Zimbabwe ngokwakuqala selokhe uhulumende kaMnangagwa wathatha umbuso kowayengumongameli, uMnu. Robert Mugabe.
Eyinye ingcitshi ecubungula ezombusazwe, uMnu Charles Nyoni, uthe ukuza kuka Lavrov kungadala ingozi yokuthi ilizwe leZimbabwe litshiyane lokuqakathekisa ukulondolozwa kwamalungelo abantu iqakathekisa ezamabhizmusi.
Kuhambo lwakhe lolu, uLavrov useyethekelele eleMozambique lele Zimbabwe, ekhangelelwe ukuya eAngola, Namibia lase Ethiopia kuhambo lwakhe olubonakala njengendlela yokufuna ukuhuga amazwe asezwekazi le Africa lokuqinisa ukusebenzelana kwezamabhizimisi lelizwe lakhe.
