Omunye wabanqotshwe kukhetho lukamongameli olusanda kwenziwa kwele Zimbabwe uthi akulasizatho esingamenza ukuthi ahambise udaba lokungqoba obemele ibandla leZanu PF emthethwandaba njengalokho okwenziwe ngumanyano weMDC Alliance.
UMnu. Joseph Makamba Busha, umkhokheli webandla le FreeZim Congress, uthi loba ukhetho lwaqhutshwa ngendlela ekhululekileyo kaluzange luqhutshwe kahle.
Wethule lokhu emhlanganweni awenze lentathelizindaba eHarare lapho aveze khona ukuthi wehluleka ukunqoba kukhetho lolu ngenxa yokuswela imali yokukhankasa.
Uthi wehluleka ukuthola imali emabhanga ukwenzela ukuthi ayisebenzise kungakenziwa ukhetho.
Omunye wakhe, uMnu. Ronald Ndlovu, owancintisa kukhetho lokudinga amalunga edale lephalamende esigabeni seBeitbridge West, uthi laye wehluleka ukukhankasa ngoba wayengenelisi ukuthatha imali emabhanga.
UNkosazana Rabelesani Ngwenya ongunobhala jikelele webandla leli esigabeni seBeitbridge, ngomunye wabakhulume emhlanganweni lo.
UMnu. Chrispen Tabvura, isikhulumeli sebandla leli, uthi luhambe kahle ukhetho lwalonyaka njengoba bekungeladlakela.
Banengi abethule imibono yabo emhlanganweni lo abagoqela intathelizindaba uMnu. Njabulo Ncube.
UNcube uthe inkulumo yabe FreeZim yokuthi benza ngcono kulamanye amabandla aphikisayo kulolukhetho iyamethusa.
Ikhomishini yezokhetho eye Zimbabwe Electoral Commission yathi uMongameli Emmerson Mnangagwa wanqoba kukhetho lukamongameli. Umanyano weMDC Alliance uyakuphikisa lokhu.
