Sebengcwatshiwe abane abomdeni munye - uSumukai Ngwenya, uKhumbulani Tshuma, uTakonowa Tshuma lo Jelous Muleya Ncube, abadabuka eBinga ababulewe butshwala obungahlolwanga kwele South Africa.
Isihlobo sabo, uNkosikazi Takesure Ndlovu, uthi bathole usizo olumangalisayo ukuze kuthwalwe izidumbu zihanjiswa eBinga.
UNkosikazi Ndlovu ubonge kakhulu abantu abancedise umdeni wakhe ekungcwabeni abane laba.
Ubonge lomsakazo weStudio 7 athi uncedise kakhulu ukubikela abantu ngokwehlele umdeni wakhe.
Abane laba banatha utshwala obathengwa ngomunye odabuka eBinga owabuthola emkambo wensitha ngenxa yokuvalwa kwendawo ezinengi ezithengisa utshwala kwele South Africa kusenzelwa ukuvimba ukumemetheka komkhuhlane weCOVID-19.
Akwazakali ukuthi wayangaphi owabathengela utshwala lobu emkambo wensitha.