Kulabantu abalitshumi lasithupha-16, abatholakale beleCovid 19, ebantwini abahlolwe eZimbabwe, ngokutshona kwelanga langoLwesihlanu. Laba bantu bakhuphule inani lababanjwe belegcikwane leli, laya kwabangamakhulu phose amahlanu-479.
Abasinde kulesi sifo bengamatshumi edlula ayisithupha-63, sabulala abane. Inengi lalaba bantu ngabanye babagcinwe endaweni ezitshiyeneyo zelizwe ezamaQuarantine Centers, abaphindele ekhaya bevela kweleSouth Africa.
Asebehloliwe ukuba baleCovid 19 loba hatshi lokhu laqhamukayo eZimbabwe, ngoMbimbitho lonyaka, sebezinkulungwane ezedlula amatshumi ayisithupha-62,928.
Emhlabeni jikelele abaleCoronavirus sebeyizigidi ezedlula eziyisitshiyagalombili lengxenye-8,616,990, kuthi asebebulewe yileligcikwane, sebezinkulungwane ezedlula amakhulu amane-457,080, abasinde kulumkhuhlane beyizigidi ezedlula ezine-4,563,307 kubika abenhlanganiso eyeWorldometer.
Emazweni awezwekazi le Africa asebebanjwe belegcikwane leli, sebezinkulungwane phose amakhulu amathathu-275,327, labulala inkulungwane ezedlula eziyisikhombisa-7,395, kwasinda inkulungwane ezedlula ezilikhulu-125,316 kubika abenhlanganiso eye Africa Union.