amalinks wokungena

Breaking News

Sebehlukunyezwa Abantu Bokuza Kwele South Africa


FILE - People rally during a march against xenophobia, in downtown Johannesburg, South Africa, 2015. Anti-foreigner sentiments have been on the rise in the country which, according to most recent data, is home to some two million foreign nationals.

Bathithibele abokuza kweleSouth Africa kulandela ukuqhamuka kokuhlaselwa kwabo lamabhizimusi abo kweleSouth Africa, kusenziwa ngabacatshangelwa ukuthi yizizalwane zakweleSouth Africa ezifuna baphume baphele kulelo lizwe.

Inqwaba yemota lezitolo ezitshisiweyo, amafasitela ezitolo alucaca indawana yonke, iminyango yezitolo lamawindi okukwatulwe kwatshiywa kuvulekile, lamatshumi tshumi ezitolo ezisele zitshaya umoya. Lesi yisimo sezamabhizimusi edlula ikhulu awezizalwane zakwamanye amazwe esitaladeni uJules elokitshini leMalvern empumalanga yeGoli.

Lumonakalo udalwe ngabacatshangelwa ukuthi yizizalwane zakweleSouth Africa kusukela izolo ntambama kantike sekumemethekele lakwezinye indawo.

Omunye odabuka eNigeria olebhizimusi lokuthengisa insimbi zokulungisa imota, ubekhala ezimathonsi ngemva kokuba bevule ngodli, babutha konke kwangasali ngitsho lensinjana.

“Ngivuswe ngo 10 ngomunye engitshela ukuthi abantu sebezenzela santando ebhizimusini lami. Ngethe ngithi ngiyakhona ngathola bevimbile, ngabukela ngikhatshana, bebanengi okwamagama, betshisa imota lokubutha impahla ezitolo. Angikaze ngibone okunjeya selokhu ngazalwayo.”

Emadabukakusa ngoMvulo ukuhlaselwa kwabokuza kumemetheke kwayangena emalokitshini abalisa iTurffontein, I Primrose eGermiston, laseTembisa.

Ngezikhathi zemini abakweleSouth Africa laba bazame ukuhlasela abakwamanye amazwe eHilbrow ehlala abeZimbabwe abanengi, kodwa bathola imbila zithutha batshaywa ngamatshe baze babaleka.

Lokhu sekutshiye abeZimbabwe abanengi sebedlela evalweni inengi lizivalele ezindlini. Kodwake njengoba kwezinye indawo betshisa lezindlu ezilabantu Phakathi, lokuzivalela lakho lokho bathi sekuyingozi enkulu.

Isizalwane seZimbabwe umnumnzana Greatman Mkhwebu uthi, kudala besitsho kuhulumende ukuthi ahlolisise amahunga hunga okuthi mhlaka 1 Mpandula abokuza bazahlaselwa kodwa yena wakutshaya indiva.

“Lentole ma isisenzeka iletha ukwesaba okukhulu kakhulu. Okokuthinje mina into engiyikhalelayo yikuthi mhlawumbe singobaba asizameni ukuthi ma ungabe uhlangana Labantwana ubakhiphe sithathe omama sibase emekhala. Ngoba singabakhulela sebengajika behlasele omama emakhaya ngoba laba bantu kuyacaca ukuthi into ababethe bayayenza bazayenza.”

Umgcinisihlalo wenhlanganiso yeAfrican Diaspora Forum umnumnzana Vusumuzi Sibanda, uthi lokhu kuhlasela kumemetheka ngesiqubu esikhulu kanti sekufanele yiloba ngubani odabuka kwelinye ilizwe enze okuzavikela impilo yakhe.

“Siyaxwayisa ukuthi abantu baqaphe kakhulu konke lapho abaya khona. Mhlawumbe bazihlalele emakhaya bangaphumi. Kumbe bazithole besiya emapolice station ma bezibona engathi amaphephanga. Funi bengahlali umuntu eyedwa bahlale bebe baningi ukuze bakwazi ukuthi bazivikele kanti njalo kungabilula ukuthi bagcine behlaselwe.”

Inkokheli zamapholisa esabelweni seGauteng sezisole ukuhlasela lokhu. Isikhulumeli samapholisa uCaptain Mavele Masondo uthi sekubotshwe iqwaba yabantu endaweni ezitshiyeneyo eseziqhamuke udlakela lolu.

“Asingeke sitsho ukuthi lokhu kuhlasela kumbe udlakela lubhekiswe kwabakwamanye amazwe. Isibonelo yikuthi izitolo ezigqekeziweyo zigoqela iPep Store leShoprite.”

Ngensonto njalo endaweni yase Ashburton kwazulu Natal abatshayeli bamaroli bakwele South Africa batshise amaroli amabili abetshayelwa ngabakwanye amazwe bebethesa umlandu wokubathathela umsebenzi.

Kusenjalo amapholisa aphakathi kokuhlolisisa imfa yabantu abathathu abatshele endlini okuyinto okucatshangelwa ukuthi ibangele ukuhlasela lokhu.

please wait

No media source currently available

0:00 0:04:04 0:00

Facebook Forum

XS
SM
MD
LG