Ebantwini abahlolwe izolo, kulabantu abane abengezelele inani lasebetholakale belegcikwane leCovid 19, eZimbabwe, laya kwabalikhulu lamatshumi phose athobaminwemibili-178. Abantu laba ngabanye babavele emazweni angomakhelwane athi kweleMozambique laseSouth Africa abagcinwe endaweni ezitshiyeneyo zelizwe, besahlolwa ukuba bangabe bebuye laleli gcikwane loba hatshi, kuquarantine/isolation centers.
Lokhu kutsho ukuba asebegula lumkhuhlane okwamanje sebesedlula ikhulu lamatshumi amane-145, kusinde abangamatshumi amabili lathobamunwemunye-29 kwafa abane.
Asebehloliwe ukuba baleCovid 19 loba hatshi, lokhu laqhamukayo eZimbabwe ngoMbimbitho lonyaka sebezinkulungwane ezingamatshumi edlula amane-45,395.
Emhlabeni jikelele asebefunyenwe belegcikwane leCoronavirus sebeyizigidi ezedlula eziyisithupha-6,300,892. Kuthi asebebulewe yileligcikwane, sebezinkulungwane phose ezingamakhulu amane-374,538, kodwa asebesinde kulumkhuhlane sebeyizigidi phose ezintathu-2,866,223, kubika abenhlanganiso yeWorldometer.
Emazweni awezwekazi leAfrica asebefunyenwe belegcikwane leli, sebezinkulungwane ezedlula ezilikhulu-147,099, labulala inkulungwane ezedlula ezine-4,228, kwasinda inkulungwane ezingamatshumi edlula ayisithupha-61,808 kubika abenhlanganiso eye African Union.