amalinks wokungena

Seliqalisile Ibandla LeZanu PF Ukwethusela Abantu eTsholotsho


Uzulu uyethuselwa ngabalandeli bebandla leZanu PF eTsholotsho.

Izakhamizi zeTsholotsho zithi ibandla leZANU-PF seliqalisile umkhuba walo omubi wokwethusela abantu lokubalela ukuba baye emihlanganweni yamanye amabandla ezombusazwe eTsholotsho ngesikhathi kulungiselelwa ukhetho.

Abenza lesisihluku babikwa kuyizakhamizi ezaziwayo sizebenzelana lelunga leziphathamandla zebandla elibusayo.

Izakhamizi ezazisemhlanganweni koMakhaza.
Izakhamizi ezazisemhlanganweni koMakhaza.

Imibiko le ivele emhlanganweni obizwe libandla leZAPU koMakhaza esabelweni seMatabeleland North lapho abantu bebesethuselwa betshelwa ukuba bengayi kulumhlangano.

Izakhamizi zeMakhaza zithi kulondoda ewaziwayo osebenzelana lelunga ledale leTsholotsho South, okade ehamba esethusela ukuthi abantu abazangena lumhlangano bazavalelwa phandle kohlelo lokutholisa abantu ukudla.

Omunye wabantu abangene umhlangano weZapu.
Omunye wabantu abangene umhlangano weZapu.

USobhuku weMakhaza, uMnunzana Sikeleto Mkhwananzi, uthe ibandla elibusayo limethesa incala lokwamukela amalunga ebandla leZAPU emzini wakhe besithi usengumthengisi.

Umgcinisihlalo wohlangothi lwabesifazana kubandla leZapu eTsholotsho, uNkosikazi Paina Khuphe, uthe kuyadanisa ukuba ngensuku zalamuhla lokhe kusaselabantu abaziwayo esigabeni abahlukuluza abanye ngokuthi basekela amanye amabandla.

Emhlanganweni weZapu koMakhaza eTsholotsho.
Emhlanganweni weZapu koMakhaza eTsholotsho.

Umkokheli webutho leZIPRA Veterans Trust, uMnunzana Ben Ncube, uthe ukuncidezelwa emhlubulweni weMaNdebeleni kuphambili njalo kweziwa libandla elibusayo.

Ugcizelele esithi njengebutho elakhulula ilizwe abasoke bavume ukuthi abantu behlukuluzwe.

Obona ngezamasiko kubandla leZAPU, uMnunzana Cosmas Zenzo Mafu, uthe labo abethusela abantu bachitha isikhathi ngoba kukhetho oluzayo amabandla aphikisayo ayakukhetho ebumbene.

UMnu. Ben Ncube
UMnu. Ben Ncube

Uthe labo abahlukuluza abantu bazaswela umlindi wokucatsha ngo2018.

Amabandla ezombusazwe eZimbabwe aseqalile ukukhankasela ukhetho lomnyaka ozayo lomanje abantu besesabela udlakela oluvame ukubangelwa libandla elibusayo. Inengi labantu lokhe lilinde ukubhalisa ukuvota ngaphansi kohlelo olutsha lwemitshina yangalezi nsuku eyeBiometric Voter Registration-BVR.

KoMakhaza bathe abasoke bavumela ukuhlukuluzwa kuyiwa ekhethweni kumnyaka ozayo ngoba umuntu oyethusela abanye bayamazi njalo bazambophisa.

Facebook Forum

XS
SM
MD
LG