amalinks wokungena

Sesibhidlika Isibhedlela Esasungulwa NguJoshua Nkomo


Joshua Nkomo

Isibhedlela sako Bulawayo ese Ekusileni esasungulwa ngumuyi, uMnu. Joshua Nkomo, owayengumsekeli kamongameli, lokhe singasebenzi kusukela ngomnyaka ka 2004.

Ukhula lezihlahla sekuhlume kwatshakaza kuthi ezinye indawo zezakhiwo seziwohloka.

Isibhedlela se Ekusileni Medical Centre, sayakhiwa ngomnyaka ka2000 yiNational Social Security Authority saphela ngomnyaka ka2003 ngenjongo kamuyi uNkomo.

Silemibheda engamakhulu amabili njalo sekudingakala imali edlula izigidi ezingamatshumi amabili ukuba siqale njalo ukusebenza. Ngo2004 saqala ukusebenza kodwa samane savalwa kulandlela isiphawulo sogatsha lwezempilakahle sokuthi kumele sivalwa ngoba imitshina ekhona ayilungelanga impilo kazulu.

Sokunzima ukuthola inkampani enganika isibhedlela lesi imali yokuthi siqalise ukusebenza. Umphathi wenhlelo Ekusileni Medical Centre nguMongameli Robert Mugabe.

Uzulu uchothoza uMugabe ngokungcindezela imibono kamuyi besithi ngabe elothando lokubona isibhedlela sisebenza ngabe sewaphuma lendlela zokuvuselela ukusebenza kwalesibhedlela.

Inengi labantu elikhulume ngesibhedlela esesivalwe butshani lezihlahla batshengise ukudabuka ngendlela isibhedlela esimi ngakhona bethi lokhu kufana lokuthi uhulumende osembusweni lokhe esilwa lomuyi ngendlela eziphansi.

Olwela amalungelo oluntu uMnu. Mbuso Fuzwayo uthi kulusizi ukuthi isibhedlela asisebenzi njalo yonke into elesandla sikamuyi, uNkomo, iyancindezelwa.

UMnu. Sengezo Tshabangu uthi kubuhlungu ukubona izinto ezilesandla sikaNkomo zichitheka ngendlela esesibhedlela.

UMnu. Iphithule Maphosa, oyisikhulumeli sebandla le Zapu, uthe akumangazi ngoba umuntu ophethe isibhedlela njalo ebusa ilizwe ufuna yonke into ibengeyakhe njalo yikho lesi sibheldlela sesibola ngoba sasungulwa ngumuntu amzondayo.

UMnu. Mbonisi Gumbo osakhulayo uthe uyadana kakhulu ngoba uHulumende kahloniphi imisebenzi kamuyi uNkomo lokuchitheka kwesakhiwo khona kulabantu abangasivuselela.

UMnu. Mojalifa Mokele, olwela ilungelo loluntu, uthe kulusizi kakhulu kusabelo sikaMthwakazi ngoba isibhedlela besingatholisa usizo kodwa sesileminyaka edlula itshumi singasebenzi sesidliwa ngumuhlwa. Uthe inkokheli zigibela indizamtshina zisiyadinga usizo phetsheya zitshiya izibhedlela elizweni ethi uMthwakazi kavuse ikhanda avule lesi sibhedlela.

UMnu. Mzingeli Dube, isakhamuzi sako Bulawayo, uthe ngabe odokotela bahlanganisa amakhanda bavule isibhedlela njalo kubuhlungu ngoba uhulumende usetshengise ukungabi lothando lokusebenza kwesibhedlela.

Umongameli webandla eliphikisayo, ele Alliance for National Salvation, uMnu. Moses Mzila Ndlovu, uthe kusizani ukwakha isithombe sikamuyi esamiswa edolobheni besekela isibhedlela sidliwa ngumuhlwa.

UMzila Ndlovu uthe ngabe lesi sibhelela sakhiwa empumalanga sabizwa ngomunye umuntu ngabe sesisebenza kodwa ngenxa yenzondo uHulumende okhona uyazehlulekela.

Facebook Forum

XS
SM
MD
LG