Iqembu lomdlalo wenguqu ele Bulawayo Chiefs selibukwe kakhulu ngabalandeli bezemidlalo ngesenzo salo esokuvula isitolo ebulenjini.
Isikhulumeli seqembu le Bulawayo Chiefs uThulani Javas Sibanda uthi abantu basemukele kuhle kakhulu isitolo sabo lesi esiqale ukusebenza ngeviki eledluleyo.
“Sebebanengi asebethengile njalo labo asebezitholile impahla abazithengileyo bayathokoza ngohlonzi lwempahla yethu. Kuyasithokozisa njalo sithanda ukuba sibonge bonke abasisekelayo,” kutsho uSibanda.
Olandela umdlalo wenguqu uSibonakaliso Ndlovu uthi iqembu le Bulawayo Chiefs litshengise ukuba liqembu lesimanje manje ngokuvula isitolo sebulenjini.
“Ukuthengisa amakawuso lezinye impahla kuyindlela yokudinga imali esentshenziswa ngamaqembu aphumeleleyo kwamanye amazwe njalo lokhu kutshengisa ukuba iqembu le Bulawayo Chiefs lifuna ukuba liqembu elihamba lesikhathi,” kutsho uNdlovu.
Iqembu le Bulawayo Chiefs lidume ngokuba labalandeli abanengi kukhasi le Twitter.
Okwamanje selilabalandeli abedlula inkulungwane ezingamatshumi amathathu njalo banengi kubalandeli laba asebefake imibiko besithi sebethengile esitolo esisebulenjini.
Impahla ezithengiswa liqembu le Bulawayo Chiefs ngezigoqela amakawuso agqokwa liqembu nxa lidlala kanye lezinye impahla ezigqokwa ngabaqhuba imidlalo etshiyeneyo.
Ikhasi elitholakala isitolo se Bulawayo Chiefs libizwa store.bulawayochiefs.com