amalinks wokungena

Breaking News

Silakho Ukuphindisela Ngokuhluthuna Impahla YeSwitzerland - Mugabe


UMongameli Mugabe uthi uhulumende ulakho ukuphindisela phezu kokuncitshwa komkakhe leziphathamandla zeZanu PF ezinhlanu amavisa okungena kweleSwitzerland ngeviki edluleyo ngokuhluthuna impahla yalelo lizwe egoqela amankampani asebenzela eZimbabwe.

UMugabe ubemele aye kweleSwitzerland lequla lakhe ebeligoqela umkakhe uNkosikazi Grace labaphathintambo bakahulumende abathi uMnu Nicholas Goche loMnu Simbarashe Mumbengegwi.

Abanye ekade bekuqula leli ngabathi umabhalane wogatsha lokwethulwa kwemibiko uMnu George Charamba, umqondisi wamapholisa eCIO uMnu Happyton Bonyogwe loMartin Kwainona olipholisa.

Bonke laba bancitshwe amavisa okungena eSwitzerland, okwenze ukucunule uMugabe njalo wamisa uhambo lwakhe lokuyangela emhlanganweni obuhlaziya ngezokuhanjiswa kwemibiko edolobheni leGeneva.

Ekhuluma lentathelizindaba ekufikeni kwakhe eHarare evele ezwekazi leAsia ngeSonto, uMugabe uthe uhulumende ulakho ukuhluthuna impahla yezizalwane zeSwitzerland eseZimbabwe njengendlela yokuphindisela.

Amankampani alelilizwe aseZimbabwe agoqela iNestle yona elungisa uchago.

Linkampani ike yathwaliswa nzima nguhulumende ngomnyaka ka2009 yacina ivala ifekithali yayo okwesikhatshana ngemva kokuba imise ukuthenga uchago epulazini likaNkosikazi Grace Mugabe.

Abalwela amalungelo oluntu yibo ababekhononile ngokubudlelwani beNestle lemuli kaMugabe, yena oyetheswa icala lokwephula ilungelo loluntu.

EleSwitzerland ngelinye lamazwe afakela uMongameli Mugabe leziphathamandla zeZanu PF izijeziso zenotho ebethesa umlandu wokwephula amalungelo kazulu lokungalandeli imithetho yelizwe.

UMugabe uthi iSwitzerland ibingelalo ilungelo lokwala ukunika amalunga equla lakhe amavisa ngoba bebelanda umhlangano weUnited Nations.

Isigodlo seSwitzerland eZimbabwe salile ukukhuluma ngaloludaba. Kodwa ingcwethi ecubungula ezombusazwe uMnu Bhekilizwe Ndlovu uthe amazwi kaMugabe kalunganga ngoba exotsha abangababefuna ukuzovula amankampani eZimbabwe.

XS
SM
MD
LG