Ontanga beZanu PF bathi bazophindisela kubo bonke abatshengisela ukukhonona kwabo ngesimo esiselizweni, abakhokhelwa yimikhankaso enjenge Tajamuka/Sesijikile, This Flag leminye. Bekhuthaza ukuba amapholisa abavumele bajezise bona abaqhubeka betshengisela bekhonona ngobukhokheli buka Mugabe.
Ontanga beZanu PF bebecula befola kumgwaqo uJason Moyo eHarare, belubhekise esigodlweni sebandla labo.
Babuthaniswe yinkokheli yabo, ukubazisa ngohlelo lokubatholisa indawo zokwakha izindlu eHarare lakoBulawayo, njengokwethembisa kukamongameli Mugabe, ekutshengiseleni kwabo kuhlelo lwe “One Million Man March”, mhlaka 25 Nkwenkwezi lonyaka
Bavele ezigabeni ezibalisa i Mashonaland West, East, Central, Manicaland leHarare ontanga laba.
Emazwini akhe, okwamukela ontanga obona ngenhlelo zabasakhulayo kuZanu PF, umnumzana Innocent Hamandishe, uthe kabasoze bagoqe izandla bebukela abantu betshengisela besola umbuso kaMugabe.
Okungumnqondo osolwe nguzulu weHarare, okubalisa umnumzana Thabani Dladla, wasemzini weHighfields.
Lalawo ma stand okuthiwa ezonikezwa ontanga, uDladla ethi yindlela esisetshenziswa yiZanu PF, ukuzama ukwehlisa amandla kwabezombusazwe abaphikisayo emadolobheni, ngokuyenga ontanga bezasuswa nje, ngemva kokhetho luka 2018.
Inkokheli yabontanga yeZanu PF, yonke ekhulume kulumbuthano ibi chothoza abafundisi abaphatheka emikhankasweni yokutshengisela isithi asumsebenzi wabo, bencoma abenkonzo yesipositoli isithi yibo amakholwa oqobo.
UMugabe ubikwa etholise uhlangothi lwabontanga ama hectares ayinkulungwane omhlaba, eHarare wokuthi babelwe izithanda zokwakhela izindlu, eHarare South, Chishawsha le Norton.
Bekugiywa kujatshulwa embuthanweni wabontanga lo, abeqembu leMbare Chimurenga Choir labo belibazisa uzulu.
