amalinks wokungena

Kulungiselelwa Umcintiswano weKwese Victoria Falls Rugby Sevens

  • Joseph Njanji

Umongameli wenhlanganiso ye Zimbabwe Rugby Union, uNyararai Sibanda.

Asekusigaba saphezulu amalungiselelo okuqhutshwa komncintiswano wakuqala owe Kwese Victoria Falls Rugby Sevens wona ozadlalelwa edolobheni le Victoria Falls ngempelaviki ezayo.

Umncintiswano we Kwese Victoria Falls Rugby Sevens ngumncintiswano osungulwe lonyaka yinhlanganiso ye Zimbabwe Rugby Union njalo usekelwa ngemali yinkampani ye Kwese Sports yona eyingxenye yenhlanganiso ye Econet.

Kulamaqembu amathathu azabe emele ilizwe le Zimbabwe kulimidlalo njalo la ngagoqela iqembu elimela ilizwe emidlalweni eyohlobo lwe rugby edlalwa ngabadlali abayisikhombisa eye rugby sevens elaziwa ngokuthi ngama Cheetahs, amahlosi ngolimi lweSiNdebele, kuzakuba khona njalo iqembu le Goshawks elibunjwa ngabadlali abalwisa ukungena kuqembu le Cheetahs kanye leqembu le Matabeleland Select.

Ekhuluma ngesikhathi lawamaqembu edlula edolobheni lako Bulawayo elubhekise edolobheni le Victoria Falls, umongameli wenhlanganiso ye Zimbabwe Rugby Union uNyararai Sibanda uthi konke sekulungele ukuba lumncintiswano uqale.

“Kulimpelaviki umhlaka 18 lo 19 zinsuku ebesikhangelele ukuba zifike njalo sezifikile nje sikhangelele ukuba amaqembu ancintisane kumidlalo yeKwese Sports. Kuhle ngoba langa lifike sekwenziwe wonke amalungiselelo njalo thina sesilinde ukuyasuthisa amehlo ethu.”

Amazwe amela iBotswana, iNamibia kanye le Zambia akhangelelwe ukuzophatheka kulimidlalo ye Kwese Victoria Falls Rubgy Sevens ikanti iqembu le Sierra Leone lalo ebelimenyiwe akukacaci kumbe lizaphumelela ukuzodlala.

USibanda uthi abathanda umdlalo we rugby kodwa abangenelisi ukuyawubukela mathupha umncintiswano we Kwese Victoria Falls Rugby Sevens ngempelaviki balakho ukuyibona limidlalo kumabona kude we Kwese Sports.

“Le yimidlalo yakuqala yemidlalo esiyilungiselele okweminyaka emihlanu elandelayo ezabe ilokhu iqhutshelwa edolobheni le Victoria Falls ngesikhathi esifanayo. Abantu beZimbabwe abangeke benelise ukufika bavule ku Kwese Sports TV ebulenjini bazasibona sidlala mathupha. Laba abenelisayo kababuye bezokholisa ukudla kwamehlo ngoba irugby edlalwa ngabadlali abayisikhombisa ayidini ukubukela.”

Imidlalo ye Kwese Victoria Falls Rugby Sevens izaqala ngoMgqibelo mhla zilitshumi lathoba minwe mbili isiyafika komlindi uyacina ngosuku olulandelayo mhla zilitshumi lathoba munwe munye.

Limidlalo izaqhutshelwa esikolo se Victoria Falls Primary.

Facebook Forum

XS
SM
MD
LG