amalinks wokungena

Sokumisiwe Ukulungiswa Kwemigwaqo Obekumele Isetshenziswe Ngamalunga eZanu PF


Ugwaqo ongaphelanga ukulungiswa eGwanda.

Sokumisiwe ukulungiswa kwemigwaqo edolobheni leGwanda obekuqale ngesiphangiphangi kumaviki amabili ayedlulileyo kulungiselelwa umhlangano webandla leZanu PF owe National People’s Conference obukhangelelwe ukuqhutshwa kulelo dolobho ngoMpandula.

Lokhu kulandela inyathelo lebandla leli lokuqhuba umhlangano omkhulu oweCongress eHarare. Inengi selisesabela ukuthi limigwaqo ngeke isaqeda ukulungiswa.

Inkampani yeHawkflight ibiphithizela kumaviki adlulileyo ilungisa imigwaqo eya emawofisini awe Central Mechanical and Engineering Department (CMED) eJacaranda lapho obekukhangelelwe ukuqhutshwa umhlangano webandla leZanu PF.

Omunye umgwaqo ongaphelanga ukulungiswa owaya esilindweni samabhasi eRenkini.
Omunye umgwaqo ongaphelanga ukulungiswa owaya esilindweni samabhasi eRenkini.

Inhlolisiso enziwe yi Studio 7 iveze ukuba izimota zalinkampani kazisekho emigwaqweni ebilungiswa njalo izisebenzi zibikwa zibonakale zithwala impahla zilubhekisa koBulawayo.

Imigwaqo esele ingaphelanga ibalisa osuka erenkini oquma elokitshini leMarriage, losuka eConstruction usiya eVehicle Inspection Department kanye losuka eZimbabwe Open University usiya eNational Foods.

UMnu. Shelton Elliot, isakhamuzi seGwanda, uthi limigwaqo kumele ilungiswe iphele.

“Babuye basibulalela umgwaqo wethu la umgwaqo obulungile … Khathesi sesibona izimota ezinkulu ama lorry lawa okuthiwa yiwo azalungisa sebuyela eHarare ngoba kuthiwa sebetshintshile ivenue yakhona abazayenza lowo mhlangano wabo oweZanu. IZanu le asisayifuni ngamasela …”

UMnu. Herbert Ncube uthi limigwaqo izakuba yingozi ngesikhathi sezulu.

“Imitshina esiyibone ilungisa imigwaqo lapha kukhanya sekumiwe imigwaqo sitshiywe ingokunye lapha ngesikhathi sezulu bagradile and izulu lingana sokuyagebheka imigwaqo asisakwazi ukuthi nxa uhulumende esenza nje kumele sithini njengezizalwane zeGwanda besikhangelele ukuthi idolobho lethu lizaba lotshintsho.”

Umgwaqo olungisiweyo ibandla leZanu PF lingakacabangi ngokwenza umhlangano weExtra Ordinary Congress.
Umgwaqo olungisiweyo ibandla leZanu PF lingakacabangi ngokwenza umhlangano weExtra Ordinary Congress.

Unobhala jikelele wenhlanganiso yezakhamizi zeGwanda, uMnu. Bekezela Maduma Fuzwayo, uthi akumangalisi ukuthi umsebenzi usumile.

“So njengoba ingasekho akusethusi ukuthi sebekhiphile izinto zabo zonke akade besebenza ngazo so kuyazicacela ukuthi kuyabe kusenzelwani. Kunengi njengoba abanye kade sebesakha amalodge. Sizahlala silindele okunye ozabuya kodwa sizahlala silemigwaqo elamagodigodi lengalungiswanga ngemfanelo.”

Okhulumela ibandla le Movement for Democratic Change ekhokhelwa nguMnu. Morgan Tsvangirai, ezansi yeMaNdebeleni, uMnu. Ekem Moyo, uthi ukuma kokulungiswa kwemigwaqo lokhu kuveza ukwehluleka kukahulumende.

“Yikuthi ibandla leli elibusayo kanenginengi kaliyenzeli uzulu njengoba sihlala sikhuluma aliyenzelii ukuthi linceda abantu liyenzela ukuthi lichaze bona. Ubutshapha lobu ababenze eGwanda kuzahlala kusemehlweni abantu. Ngomnyaka ozayo abantu bazakuba kwazi ukuthi lababantu ngeke sibavotele.”

Lobanje singenelisanga ukuxoxa leziphathamandla zekhansili ngaloludaba, imbiko esiyitholileyo iveza ukuthi IHawkflight ayikabhadalwa imali yayo yinkampani kahulumende ebona ngokulungiswa kwemigwaqo iZimbabwe National Road Authority.

Limigwaqo ibikhangelelwe ukuthi iyabe isiphelile ukulungiswa ngenyanga ezayo.

Ibandla leZanu PF selithe lizabuya ngomnyaka ozayo ukuzoqhuba umhlangano weNational People’s Conference kuleli dolobho. Lonyaka selizakwenza umhlangano weExtra Ordinary Congress eHarare.

Facebook Forum

XS
SM
MD
LG