amalinks wokungena

Breaking News

Izifundi Emakolitshini eSouth Africa Zitshengisela Ezitaladini Zikhonona Ngemali Yezifundo


University Students Demo

Amakhulu ezifundi zeZimbabwe ezifunda emakolitshini ezemfundo kweleSouth Africa sezileviki zingafundi ngenxa yokutshengisela kwezifundi zemauniversity elizweni jikelele osekubangele ukuvalwa kwawedlula itshumi lengxenye.

Izifundi zifuna imali ezizayibhadala ngomnyaka ozayo ingakhwezwa kodwa amauniversity wona athi lokho ngeke kwenzeke.

Lo ngumkhosi obuhlatshwa ngabafundi ngesikhathi amapholisa ebahasa ngentuthu eqala idubuke ingakakuhitshi, ebaxotsha ukuthi bengatshengiseli emagumeni ephalamende ngoLweSithathu.

Sekuleviki izifundi zemakolitshini kweleSouth Africa zitshengisela phansi kwesihloko esithi FeesMustFall. Ukutshengisela lokhu kulandela izimemezelo zamauniversity zokukhweza imali yomnyaka ozayo ngokungaphezu kwetshumi ekhulwini.

Le yinto ezakwenza labo abafunda behlala emauniversity bazithole sebebhadala izinkulungwane ezilikhulu zamarandi (R100,000) ngomnyaka.

Lokhu sekwenze abafundi baqeda iviki bengafundi osekwenze amaunirvesity alitshumi lasitshiyagalombili avala iminyango. Leyinto esiphazamise amakhulu ezifundi zeZimbabwe ezifunda kweleSouth Africa. Lazoke sezingene kuleli qula elithi kumnyama kubomvu, kazibuyeli ezifundweni zingaphiwanga isiqiniseko sokuthi inhlawulo yemfundo yabo kayisoke ikhwele.

Umfundi weZimbabwe uBanele Khumalo oqhuba izifundo zobuNjinela eUniversity ye Witwatersrand eJohannesburg uthi sebengene kulokhu kutshengisela njengoba labo ukhukhwela kwenhlawulo le kubathwalise amagabha avuzayo.

Uthi bafuna njalo ukutshiya balungesele abanawabo abazazofunda kweleSouth Africa njengoba sekunzima ukufunda eZimbabwe.

Leyinto esekelwa ngomunye umfundi weZimbabwe uCasper Khanye, oseUniversity ye Johannesburg yena othi benza lokhu ngoba besazi ukuthi abazali babo bathwalenzima kangakanani ukubadingela imali yokuyafunda kweleSouth Africa.

Kusenjalo ibandlaq elibusayo kweleSouth Africa selisekele isikhalazo sabafundi laba sokuthi imali yesikolo ingakhwezwa. UNobhalala jikelele waleli bandla umnumnzana Gwede Mantashe uthi inyathelo lamauniversity la lokukhweza imali, yisenzo sangabomo sokufuna ukuncindezela abafundi abangabayanga.

Ngakolunye uhlangothi ukutshengisela kwabafundi laba sekwenze izwe lonke lama ngamazwane. Umthethwandaba kaMantshi eCape Town ucine usukhulula abafundi abangamatshumi amathathu ababotshwe ngesikhathi sokutshengisela lokhu. Ngakolunye unhlangothi ibandla leEconomic Freedom Fighters selikhuthaze ukuthi iphalamende ibelomhlangano wesiphangiphansi ukuze kutholakale impendulo yezikhalazo zabafundi.

Umongameli Jacob Zuma laye uselusukumele loludaba njengoba esebize umhlangano wesiphansiphansi labaphathi bamauniversity kanye lenkokheli zabafundi kusasa ukuze kwenziwe isivumelwano abafundi babuyele esikolo.

Izifundi zemaUniversity zitshengisela
please wait

No media source currently available

0:00 0:04:18 0:00
Lapho esitholakala khona

XS
SM
MD
LG