amalinks wokungena

Breaking News

State Universities Staff Association Representatives: Amalunga Ethu Akesenelisi Ukuya Emsebenzini


University_of_Zimbabwe

Abenhlanganiso emela izisebenzi zemakolitshini amaUniversity kahulumende abeState Universities Staff Association Representatives bathi amalunga abo akesenelisi ukuya emsebenzini ngoba indleko zokugada ukuya khona kanye lokuziphilisa nje sezingaphezu kwamandla azo ngeholo elizitholayo.

Encwadini yazo yokwazisa ngaleli nyathelo izisebenzi zemaUniversities kahulumende alitshumi zithi zilithethe lelinyathelo ngemva kokunanzelela ukuba imizamo yokukhalaza kumphathintambo wogatsha lwezemfundo yaphezulu yehlule. Bathi kusukela ngenyanga kaMbimbitho walonyaka bezama ukuxoxisana lomphathintambo walolugatsha ukubonisana phezu kwemali yokubasiza eyeLiving Adjustment kodwa kungekho okuphumayo.

Izisebenzi zamakolitshi amaUniversity athethe leli nyathelo ngathi i-University of Zimbabwe, National University of Science and Technology – NUST, Zimbabwe Open University, Midlands State Univesrity, Lupane University, Bindura State University, Marondera State University, Great Zimbabwe University, Harare Institute of Technology le Gwanda State University.

Encwadini le, iziphathamandla ezingathandanga ukuthatshwa amazwi, zithi zatshelwa ukuthi zilindele impumela yengxoxo ebezisenziwa phansi kwenhlanganiso yezisebenzi zikahulumende ye APEX Council.

Unobhala wenhlanganiso yezifundi zemakholitshini emfundo yaphezulu eye Zimbabwe National Students Union – ZINASU uTapiwanashe Chiriga uthi kumele uhulumende aphathe loludaba ngonanzelelo olukhulu.

“Thina njengezifundi sifuna ukufunda, kunengi esidlule kikho kuwonalo umnyaka ka 2020 kungakho siyawufuna lumnyaka wokufunda. Kungaba lihlazo nxa uhulumende engehluleka ukululungisisa loludaba ngendlela elokuhlakanipha ukuze lungaze lwenza thina sehluleke ukufunda. Kodwa ke siyakuqakathekisa lokho abazali bethu abangakho, abayibo izisebenzi zemaUniversity. Kumele base abantwana ezikolo, bafuna ukufundisa thina abantwababo, bafuna ukusilondoloza, bafuna ukusitholisa ukudla lakho konke okudingakalayo. Sikhuthaza uhulumende ukuba aphange alulungisise loludaba ngoba sezivele sezikhona izifundi kula maUniversity, zona ezilesikhathi esinlutshwana sokufunda njalo leso sikhathi kumele sisetshenziswe ngokwaneleyo.”

Owake waba ngunobhala jikelele weZINASU, uMnu. Ashely Pfunye, uthi uhulumende kumele alungisise loludaba ayeke ukube lokhe elwisana labakhalazayo.

“Ngoba akusela kuhlaliseka elizweni, amabutho okumele esivikela kuzinto ezingaphazamisa inhlalakahle, yiwo asehlukumeza abantu, yiwo ahamba etshaya abazali bethu, yibo abantshontsha abanewethu labodadewethu. Lokho kuyizinto ezibuhlungu ngoba ayisiyo into abamele bebe beyilwela, ayisiyo into okumele bebe beyiyenza ama citizens akuleli.”

Imizamo yokukhulumisana labogatsha lwezemfundo yaphezulu yehlule njengoba engekho obedobha ucingo kumbe ukuphendula imilayezo esiyithumele ngendlela yokukhulumisana yeWhatsApp. Isiphathamandla ehlangothini lwezokukhulumisana lozulu unkosazana Chipo Mayeza engazange azihlupha ukuphendula umlayezo othunyelwe ngendlela ye WhatsApp lanxa ubufakazi buveza ukuba uwufundile.

Ekhuluma edale lephalamende kumaviki edluleyo umpathintambo wezemali wakubeka sobala ukuthi njengohulumende basahlolissisa udaba lokwengezelela izisebenzi iholo kodwa akasoze enelise ukuzihlawula ngedola leMelika njengokukhalazwa ngabanengi ngoba engela ndlela yokulithola.

Udaba lwezisebenzi zamaUniversity siluphiwa nguMavis Gama
please wait

No media source currently available

0:00 0:04:03 0:00

Facebook Forum

XS
SM
MD
LG