amalinks wokungena

Breaking News

Sunday Chidzambwa: Ngizasebenzisa Umncintiswano weCOSAFA Ukulolongela Imidlalo yeAFCON


(Photo: CAF)

Umqeqetshi weqembu elimela ilizwe emdlalweni wenguqu, uSunday Chidzambwa, uthi uzasebenzisa umncintiswano weCOSAFA ukulungiselela ukuphatheka kweqembu leli kumidlalo eyokudinga intshantshu zezwekazi lase Africa eye AFCON.

Phakathi kwabadlali abangamatshumi amathathu lantathu umqeqetshi weqembu lesizwe elama Warriors uChidzambwa ubize abadlali abayithoba minwe mbili kuphela abadlala besekhaya kwele Zimbabwe kusithi abanye bonke badlala phandle kwelizwe.

UChidzambwa utshele intathelizindaba ukuba lokhu ukwenze ngoba efuna ukusebenzisa umncintiswano we COSAFA njengethuba elokuba ahle alungiselele iqembu lakhe ukuphatheka kumncintiswano wokudinga amaqembu azakuyaphatheka kumncintiswano we AFCON ngomnyaka ozayo.

Intathelizindaba yezemidlalo uNash Mkokwayarira uthi lokhu kutsho ukuba iqembu le Zimbabwe selingaqhuba nzima kumncintiswano we COSAFA ngoba abadlali balo bengajwayelanga ukudlala bebonke.

“Iqembu elikhethwe nguSunday ngibona lilihle ngoba lilabadlali abanengi abadlala phandle kwelizwe kodwa ngibona inkinga izakuba kuma combinations ngoba abanengi bazabe beqala ukudlala bendawonye.”

Olandela umdlalo wenguqu uSibonakaliso Ndlovu uthi uChidzambwa wenze kuhle ngokuhle abize abadlali afuna ukubona kumbe bengamphathisa kumkhankaso we AFCON ngoba amathuba okubalabo okwesikhathi eside bengalandanga umncintiswano ofana loweCOSAFA engekho.

“USunday utshengise ukuhlakanipha kakhulu ngokuhle abize abadlali ababasebenzisa ku AFCON ngoba usezahle abone ukuba bengamncedisa njani kanti vele leZIFA ibingeke imnikeze ithuba lokulungiselela ngemfanelo wona umkhankaso we AFCON.”

UMkokwayarira yena uthi inkinga alayo ngeyokuthi aluba inhlanganiso ebona ngokuqhutshwa komdlalo wenguqu kwele Zimbabwe eye Zimbabwe Football Association iyakhetha umqeqetshi ozaqeqetsha iqembu lelizwe ngoba uChidzambwa ebambe lesisikhundla kusadingwa umqeqetshi omutsha.

“Khathesi singathi yena (uChidzambwa) ubambele omunye yikho uzalungiselela njani ikusasa yeqembu yena kungasuye ozazibamba esidukwini.”

Umncintiswano we COSAFA uzaqhutshelwa elizweni le South Africa ekupheleni kwenyaka kaNkwenkwezi mhla zingamatshumi amabili lesikhombisa njalo izaphela ngenyanga ezayo eka Nhlangula mhla ziyisikhombisa.

Iqembu leZimbabwe yilo eliphethe isicoco ngemva kokunqoba nyakenye.

Umkhankaso we AFCON wona uzaqhubekela phambili ngenyanga kaMpandula.

Facebook Forum

XS
SM
MD
LG