amalinks wokungena

Breaking News

U-Beatrice Mtetwa Uvinjwa Ukuqhubeka Eligqwetha Elimmela uHopewell Chin'ono


Unkosikazi Beatrice Mtetwa

Umthethwandaba kaMantshi oweHarare, unqume uvimba igqwetha elimela intathelizindaba elodumo, uHopewell Chin’ono, uNkosikazi Beatrice Mtetwa, ukuqhubekela phambili ngalumsebenzi ngemva kokuba abatshutshisi, bemethese umlandu wokuloba okwenzakala ekuthonisweni kwaloludaba enkundleni yokuxhumana eyebulenjini, ekhasini lakhe kuFacebook.

U-Mantshi Ngoni Nduna, wethule lesi sinqumo esithi kame ukumela uChin’ono ngoba akulobayo ekhasini lakhe ku Facebook esephula umthetho njalo eseyisa idale.

UNkosikazi Mtethwa ubikwa elobe ekhasini elilegama lakhe elithi “Beatrice Mtetwa and the Rule of Law” esithi uChin’ono wabotshelwa ezombusazwe yikho walethwa emthethwandaba efakwe izankosi lasenyaweni. Kodwa unkosikazi Mtetwa uyalilandula lelocala esithi lelikhasi lasungulwa nguLorie Conway, isizalwane seMelika owake wasebenza lo Chin’ono ngesikhathi besebenza emfanekisweni webhayisikopu olandisa ngempilo yakhe esebenza njengegqwetha, esithi yena akalalo ikhasi kuFacebook.

U Nduna uthi ukubhala okunje kutshotshozele umhlaba wonke ukuthi uhlabe umkhosi usithi akaphathwa kuhle uChin’ono.

Lanxa engelalo ikhasi leFacebook, uMantshi Nduna uthi uNkosikazi Mtethwa kwakumele abone ukuthi achitshiwe lawo mazwi ayebhaliwe.

Uqhubeke ekhuthaza abewhofisi yomtshutshisi omkhulu elizweni, u Attorney General Kumbirai Hodzi, ukuthi bathathe amanyathelo ukubona ukuba umiswa phambi komthethwandaba uMtetwa esetheswa icala lokweyisa idale. Wathi njalo abenhlanganisa elawula ukusebenza kwamagqwetha elizweni eyeLaw Society of Zimbabwe kumele bathathe amanyathelo awokumjezisa athathelwe isicoco sokuba lilunga.

Kodwa uMtetwa uthi akamangaliswa yilesi sinqumo esethulwe lidale edabeni lwakhe.

“Ngithemba lonke lazizwela lonke njalo lisawakhumbula amazwi akhulunywa ekuqaleni kwawonalo umnyaka lapho kwathiwa khona kumele athwaliswe nzima amagqwetha, bathwaliswe nzima abodokotela, sebeqale ngamagqwetha ke. Lokhu abakwenzayo kimi, kuyethusa kumagqwetha kakhulukazi asacathulayo. Injongo yikutshela lawo magqwetha alwela ilungelo loluntu, ukuthi ungamela umuntu okuhlangothi olunje, uzokubona okukhulu. Akukodwa lokhu, ukuthi sekulalesi sinqumo esithi mangimiswe phambi komthethwandaba.”

Ingcwethi zezomthetho lezicubungula ezombusazwe bathi kabamangaliswa yilesi sinqumo somthethwandaba edabeni lukaMtetwa. Omunye walezi ngcwethi ngumnumzana Mlindelwa Mancitshana.

“U Beatrice Mtetwa ngumama oyintshantshu kumbe esingathi oyingcwethi endabeni zokuba ligqwetha lezi, okuyinto engafunakaliyo ngabemaCourts laba. Sesingathi i justice yeZimbabwe ayikho, lokhu sekuvelile lapho lowo onguye okade ethenjiwe ukuthi nguye omela abantu, nguye osezakhangelana le State, sokuthiwa hayi kumele ume, ngezizatho ezingaziwayo, ngezizatho ezingacaciyo. So lokhu sokuhle kwabulala ithemba kade likhona elincane lona lelo emaCourts ethu kumbe kujustice yethu eyelizwe. Akusela lutho esesingaluthemba nxa amaCourts esesetshenziswa ngaleyindlela eyokuthi avikele abanye kodwa abuye asetshenziswe futhi ukuhlukumeza abantu banye bona labo futhi okumele ngabe umthetho yiwo obavikelayo.”

Kwasekelwa ngumqondisi wohlangothi lwezokukhulumisana esigabeni sangezansi yelizwe, ebandleni le ZAPU, umnumzana Patrick Ndlovu othi okwenzakeleyo kuyethusa.

“Ngoba sekuyimvama khathesi lapha kwelakithi ukuthi labantu laba abakomthethwandaba, komhlaba uyalingana, umhlaba awusalingani, usugobele ngale esihlalweni sokubusa. Sibona ingani uMantshi lapha usuke wayedlulisa amandla akhe, akusikho emandleni akhe ukuthi akhulume ngobumeli. Ngoba ukukhuluma ngobumeli, usuka adle amalungelo kaChin’ono. ”

Uqhebeke ethi yikho kanye uzulu ahlala ekhala ngakho ukuba kuyimisebenzi yenkohlakalo ekusibanga esiphezulu.

“So thina besingaboni njengebandla ukuthi usebenzise amandla alawo, awathola kuConstitution yeZimbabwe. Akusimangalisi kodwa kuyasethusa ukuthi ububi lobu lokubola lokhu sekufike kulelo izinga. Kutsho ukuthi akuselamuntu oya emthethwandaba, umhlaba awuthole ulingene. Umthethwandaba, umhlaba usukhangele ngale, suqansile sibili nxa ungumuntu ongekho ebandleni elibusayo. ”

Elinye njalo igqwetha elilodumo u Proffessor Lovemore Madhuku uthi kulilungule lakhe umuntu ukumelwa ligqwetha alifunayo njalo esithi isinqumo sokumisa uMtetwa ukumela uChin’ono silakho ukuphikswa emthethwandaba waphezulu oweHigh Court. U Madhuku uveze lokhu ekhasini lakhe lenkundleni yeTwitter ngesikhathi ephendula imibuzo uzulu akade embuza yona.

Besingakezwa ukuthi abenhlanganiso yamagqwetha eyeLaw Society of Zimbabwe – LSZ, bona bathini njengoba omunye wabakuhlangothi lwezokukhulumisana lozulu kiyo, umnumzana Richard Chidza ebethembise ukwethula umbiko phezu kwaloludaba kodwa size saya emoyeni singakawutholi lowo mbiko.

Ngemva kokwethulwa kwalesi sinqumo, uChin’ono uhle waqala ukupha ubufakazi emthethwandaba, phezu kwesimo esisemajele kodwa intathelizindaba lozulu bengavunyelwa ukulalela loba ukuba khona edale. Okwamanje usemelwa ligqwetha, u Advocate Taona Nyamakura ngemva kokwethulwa kwesinqumo sokuvimba uMtetwa.

U Chin’ono ukhangelelwe ukuqhubekela phambili esipha ubufakazi bakhe kusasa lokhu ngemva kwesicelo sakhe sokuba atholiswe ithuba lokuhlawula isibambiso iBail esithi ngoba sekukhona osekuguqukile kusukela ekuqaleni lapho umthethwandaba wamncitsha khona lelithuba.

U Chin’ono wetheswa umlandu wokutshotshozela uzulu ukuthi atshengisele ngendlela elodlakela mhla ka 31 Ntulikazi kusukela emazwini akhe abikwa ewalobe enkundleni yokukhulumisana yebulenjini eye Twitter esekela lokhu kutshengisela okwakubizelwe ngabomkhankaso we 31st JULY MOVEMENT wona okhokhelwa ngumnumzana Jacob Ngarivhume laye owetheswa umlandu ofanayo.

U Ngarivhume ukhangelelwe ukuphindela emthethwandaba ngoLweSihlanu lapho akhangelele ukuthola isinqumo edabeni lwakhe lokucela ukuthi icala lakhe lithoniswe evela emzini wakhe esithi ngoba sekukhona osekuguqukile okumayelana lokwabangela ukuncitshwa kwakhe ithuba lokuhlawula isibambiso seBail.

Udaba lokuvinjwa kukaMtetwa ukummela uHopewell Chin'ono siluphiwa nguMavis Gama
please wait

No media source currently available

0:00 0:07:21 0:00

Facebook Forum

XS
SM
MD
LG