amalinks wokungena

Breaking News

U-Hopewell Chin'ono Uncitshwa Ithuba Lokuhlawula iBail


Zimbabwe Journalist Hopewell Chin'ono and Transform Zimbabwe Leader Jacob Ngarivhume

Intathelizindaba elodumo, uHopewell Chin’ono, obotshwe ekuqaliseni kwaliviki, walelwe ithuba lokuthi ahlawulele isibambiso sebail, ukuze athoniswe evela ngekhaya, nguMantshi Ngoni Nduna waseHarare, ngakhoke uzaqhubeka evalelwe aze aphindele emthwendaba mhla ka 7 Ncwabakazi.

Lesi sinqumo siza ngemva kokuba umtshutshisi uWhisper Mabhaudhi ethe akumelanga aphiwe lelithuba uChin’ono ngoba elakho ukwephula iziqondiso zeBail okuvezwa yikuba uhluphane lamapholisa lapho embopha emzini wakhe eChisipite.

Lokhu kuza ngemva kokuba uMnu. Jacob Ngarivhume omunye wababotshwe sikhathi sinye laye okhokhela ibandla eliphikisayo ele Transform Zimbabwe, onguye njalo okhokhela umkhankaso wokutshengisela ohlelwe ukwenziwa mhla ka 31 kuyonale inyanga we 31st JULY MOVEMENT, laye ayalelwe ukuhlawula isibambiso seBail.

Igqwetha lika Ngarivhume umnumzana Moses Nkomo uhle wakubeka sobala ukuba sebekhweza emthethwandaba we High Court loludaba bephikisa isinqumo lesi. UChing’ono loNgarivhume ababotshwe ngoMvulo betheswa icala lokutshotshozela udlakela.

Isikhulumeli senhlanganiso yentathelizindaba eye Young Journalists Association Zimbabwe – YOJA umnumzana Leopold Munhende upha umbono wakhe.

“Le yinto esesiyijwayele le, siyakwazi ukuthi uhulumende nxa kungaba lentathelizindaba eziyabe zingani sezibhala abangakuthandiyo bona, abangakufuniyo, uhulumende uyasebenzisa amapholisa lamasotsha lamaCIO, ukumthatha, emtshaye, bemethusele kumbe beke beke bemcatshise okwesikhathi esincinyane ukuthi bemethusele nje, engaphindi ekwenze. Lokhu esikubonayo osekusenzakala endabeni kaHopewell Chin’ono yikuthi bazama ukuthi engabi lokhe ebhala lokho kade ekubhala especially kuTwitter ngabo bona especially amalunga aweZanu Pf la athi wona benza okobugwelegwele.”

UMunhende uthi isizatho esikhulu sokubopha abasola uhulumende abanjengo ngoHopewell lo Ngarivhume yimizamo yokwethusela uzulu ongafisa ukuphatheka ekutshengiseleni kuka 31 Ntulikazi.

“ Njalo abafuni ukuthi kube leDemonstration okufuze ibe khona mhla ka31. U Hopewell, akwenziwa yi State yikwethuselwa nje kuphela, kasoze agwetshe lo bethi sebemvalele, hayi.Bazamtshiya, lapha basamethusela kuphela. Okuzalandela yikuthi bengabona engethuselekanga, engethukanga yena ngokwakhe, sizabona sebemtshaya phambili lapha. Sibone sebengani sebebulala izinto zakhe, sebemlanda kwezinye indawo. Sesikujwayele lokho, yiyo iZimbabwe esesiyijwayele yone leyo. ”

Ngakolunye udaba olufanayo obelusemithethwandaba, uMayor weHarare uCouncillor Hebert Gomba laye ulincitshiwe ithuba lokuhlawulela isibambiso sebail. UGomba wetheswa umlandu wokusebenzisa amandla ewofisi yakhe ngendlela engayisiyo kanye lemisebenzi yonkohlakalo kwezokuthengiswa kwendawo zokwakha ama stands. Amagqwetha ka Gomba kungu Proffesor Lovemore Madhuku encedisana lomnumzana Harrison Nkomo.

UChin’ono yena umelwa ngamagqwetha awenhlanganiso eye Zimbabwe Lawyers for Human Rights – ZLHR, uNkosikazi Beatrice Mtetwa, Douglas Coltart loGift Mtisi.

Lokhu kwenzakala ngesikhathi abenhlanganiso ezilwela ilungelo lentathelizindaba kanye lozulu jikelele ezwekazi leAfrica lasemhlubulweni wangezansi kwezwekazi leAfrica sebelobele umongameli Cyril Ramaphosa weleSouth Africa ukuba angenele kudaba lokuhlukunyezwa kukaHopewell lezinye intathelizindaba okwenziwa nguhulumende kamongameli Emmerson Mnangagwa.

Kodwa uhulumende uthi akekho ongaphezu komthetho, bezabotshwa bonke abaphatheka kumikhankaso etshotshozel;a udlakela loba ukwephula iziqondiso zeLockdown ngesikhathi ilizwe limelana leCovid 19.

Lokhu kufakazwa yimibiko eqhubeka ikhitshwa yiziphathamandla zikahulumende lezeZanu PF, ezigoqela umabhalane wezokwethulwa kwemibiko, umnumzana Nick Mangwana, osaphethe isikhundla sokuba yisikhulumeli se Zanu Pf, umnumzana Patrick Chinamasa, labanye, abakubeka sobala embikweni yabo abayiloba enkundleni zokukhulumisana zebulenjini ezinjengeTwitter ukuba bazobotshwa bonke abaphatheka kumikhankaso ephazamisa ukuthula elizweni kungakhathalekile ukuba bangobani.

Facebook Forum

XS
SM
MD
LG