amalinks wokungena

Breaking News

UHopewell Chin'ono Uzaqhubeka Evalelwe Aze Aphindele eDale


Intathelizindaba uHopewell Chin’ono, uzaqhubekela phambili evalelwe aze aphindele emthethwandaba ngoLwesibili ngeviki ezayo lapho okukhangelelwe ukwethulwa isinqumo kusicelo sikahulumende esokuthi igqwetha lakhe, uNkosikazi Beatrice Mtetwa, avinjwe ukummela.

Umtshutshisi ekuthethweni kodaba likaChin'ono, uMnu. Whisper Mabhaudhi, ukhweze isicelo emthethwandaba esithi idale kumele linqume ukuba uNkosikazi Mtetwa angavunyelwa ukuqhubeka emmela ngoba eloba konke okukhulunywa edale, enkundleni yokuxhumana eye bulenjini eyeFacebook ekhasini lakhe ele “Beatrice Mtetwa and the Rule of Law”.

NgoLwesihlanu, uHopewell ubesipha ubufakazi kudaba olwetheswa igqwetha lakhe uNkosikazi Mtetwa, esithi ikhasi okuthiwa nguhulumende ulobe kilo kasilo lakhe. Lelo khasi libikwa liphathelane lefilimu echaza ngempilo yakhe elasungulwa yintathelizindaba yakweleMelika.

Unkosikazi Mtetwa yena uthi ngokumvimba ukuthi ammele uHopewell uhulumende uzama ngazo zonke indlela ukudonsa isikhathi sokuthoniswa kwecala lelo ngokudinga izikhubeko zokwengezelela ukuhlala kwakhe evalelwe engavunyelwa ukuhlawula isibambiso seBail.

Kodwa umutshutshisi kuloludaba uMnu. Whisper Mabhaudhi, kayisiyo njongo kahulumende yokuthi uHopewell avinjwe ilungelo lokuthi udaba lwakhe lwahlulelwe kuhle njengokutsho kukaNkosikazi Mtetwa.

UNkosikazi Mtetwa, yena uqhubeka esima ngelokuthi akalani laleli khasi elikuFacebook njalo lanxa isicelo sikahulumende silobufakazi obeneleyo idale lilakho ukumvimba ukuthi ammele uHopewell nxa loludaba solungenelwe yinhlanganiso yamagqwetha eye Law Society of Zimbabwe.

UMahluli uNgoni Nduna, uthe uzakwethula isinqumo sakhe kulelisi sicelo sikahulumende sokukhitshwa kukaNkosikazi Mtetwa ukummela uHopewell ngoLwesibili lweviki ezayo ngoba esafuna isikhathi sokuhlaziya ubufakazi obethulwe edale ngoLwesihlanu. Ngemva kokupha isinqumo kusicelo sikahulumende sokukhonona ngoNkosikazi Mtetwa, ngoLwesibili, uMahluli kulapho azakuzwake ubufakazi bukaHopewell obuphathelane lesimo semajele, esibikwa siyingozi enkulu kumpilakahle yezisebenzi zemajele lezibotshwa ikakhulu khathesi ilizwe lizama ukulwisana lokumemetheka kweCovid 19.

Facebook Forum

XS
SM
MD
LG