Umongameli Barack Obama weMelika uthi inani labasakhulayo bemazweni awezwekazi leAfrica atshiyeneyo abazaphatheka kuhlelo lweMandela Washington Fellowship ngomnyaka ozayo lizaqonga ngokuphindwe kabili njalo uthi uhlelo lolu luzaqhubeka lanxa esesukile esikhundleni.
Ekhuluma emhlanganweni awenze labasakhulayo asebegqiba izifundo zabo phansi kohlelo lweMandela Washington Fellowship ngMvulo, umongameli Obama uthe banengi ontanga abafuna ukuphatheka kuloluhlelo. Ngalokho uthi ngomnyaka ozayo inani labasakhulayo laba lizakhwezwa lisuka kumakhulu amahlanu lonyaka liye kunkulungwane eyodwa ngomnyaka ozayo.
Utshayele ihlombe ontanga asebegqiba izifundo zabo laba esithi uyaziqhenya kakhulu ngabo ngoba betshengise ukuba bazimisele ukuthuthukisa amazwe abo. Uveze njalo ukuthi ngomnyaka ozayo uzathumela abasakhukayo beMelika abangamatshumi ayisitshiyagalombili eAfrica bayefunda ngokwenzakala emazweni la phansi kohlelo lweMandela Washington Fellowship lolu.
Uqhubeke ethi ngoMvulo ilizwe lakhe livule ihofisi kwele Kenya ngenjongo yokuphathisa osomabhizimusi abasacathulayo. UObama uthe njalo amanye amahofisi azavulwa ePretoria kwele South Africa laseDakar, eSenegal.
Ontanga beZimbabwe abaphatheke kuhlelo lolu lonyaka bangamatshumi amathathu njalo bebeqhuba izifundo zabo emakolitshini atshiyeneyo. Omunye wabahlangane loObama namhla ngu Promise Muleya yena obonge uObama ngokuqhuba uhlelo lolu ngoba esithi kunengi akufundileyo.
UObama ukhuthaze njalo ukuhlonitshwq kwamalungelo abantu abagogekileyo, abesifazana, izitabane kanye lamalungelo nje wonke oluntu. Abasakhukayo laba bahlabelele uObama ingoma yokumfisela impilo ende ngaphambilini kwelanga lakhe lokuzalwa elinanzwa mhlaka 4 Ncwabakazi.