amalinks wokungena

UArthur Mutambara Wethulela Uzulu Ugwalo Lwakhe

  • Bennedict Nhlapho

Izifundi lezikhwicamfundo ezilalele uMnu. Arthur Mutambara esethula ugwalo lwakhe.

Owangengumsekeli kamkhokheli kahulumende ngesikhathi sikahulumende womanyano, uMnumnzana Arthur Mutambara useyethule ugwalo olulesihloko esithi ‘In search of the elusive Zimbabwean dream’ kusitsho ukuzingela iZimbabwe elokhu isala ukutholakala.

UMutambara utshele izikhwicamfundo, izifundiswa, abezombusazwe lezizalwane zeZimbabwe abezisembuthanweni wokwethulwa kogwalo lwakhe eJohannesburg, ukuthi injongo yalolugwalo yikwethula amaqhinga angasetshenziswa ukufeza amaphupho abantu ababelawo ngeZimbabwe ngesikhathi ithola uzubuse.

Kugwalo lwakhe lolu olulamakhasi edlula amakhulu amabili (249 pages) umnumnzana Mutambara uzibuza eziphendula ngokuthi yayangaphi iZimbabwe eyalwela ngabanengi, izinkulungwane zalahlekelwa zimpilo. Uveza ubunono beZimbabwe ngo 1980 ngomnotho, inala kanye lemali okwakugxozisa omakhelwane indenda.

Ibhuku lika Arthur Mutambara.
Ibhuku lika Arthur Mutambara.

UMutambara ke uthi umbuzo omkhulu yikuthi latshontshwa ngubani leliphupho.

“Lithini iphupho leZimbabwe? Ukuthula, ukuhlaliseka, ukulingana, inkululeko, umbuso okhululekileyo onakakela wonke umuntu. Kulokuthula yini phakathi kwakho lomakhelwane? Kulokuthula yini elizweni? Awubatshayi yini abawamanye amabandla? Inkululeko kufanele ikholiswe nguye wonke umuntu.”

Lolugwalo lulandisa njalo ngosekonakele lubuye luqakathekise ukuthi sekuyisikhathi sokuyalidinga leli phupho leZimbabwe kawonkewonke, umnotho lezombusazwe okusiza wonke umuntu.

“Umnotho welizwe owabelwana ngokulinganayo. Impumeleyo yakhe wonke umuntu. EZimbabwe konke lokhu asikakuboni. Eminyakeni yakuqala kazibuse kwangena iGukurahundi. Eminyakeni esisanda kwedlula kiyo amabandla aphikisayo adliswa imbuya ngoluthi. Abantu abalalo ilungelo lokwethula imibono lokubuthana. Umbuso wakhona ngowabalutshwana. Intuthuko yakhona ngeyengcosana.”

UNkosikazi Jacqueline Mutambara, umka Arthur Mutambara lengane yabo.
UNkosikazi Jacqueline Mutambara, umka Arthur Mutambara lengane yabo.

UMutambara uqhubeka kulolugwalo elanda imbali yosendo lwakhe, akhulume njalo ngempilo yakhe esasengumfundi kuze kube ngesikhathi esengumsekeli kamkhokheli kahulumende kuhulumende womanyano.

Lolugwalo soluthole ukunconywa kakhulu yizifundiswa labantu kazana. Umkhokheli weUniversity of Johannesburg uSkhwicamfundo Tshilidzi Marwala, uthi ugwalo lolu lukhombisa khona ukuthi uMutambara ulesipho sokukhokhela.

“Ngiyakwazi ukuthi uzaphiwa inhlonipho yokuba ngumbalisi ohloniphekayo eUniversity of Johannesburg. Omunye wemisebenzi emikhulu esizakupha yona yikukhokhela ezinye inkokheli zethu. Sikhokhele singene kuntuthuko enkulu eyesine.”

Arthur Mutambara
Arthur Mutambara

Isizalwane seZimbabwe, uMnu. Mutumwa Mawere, yena uthi kuqakathekile ukuthi sande isifiso sokuloba eZimbabwe ukuze imbali yokwenzakalayo ingalahleki.

“Kufanele simtshayele izandla uArthur ngokubhala ngoba inengi lendaba zethu ziphelela engqondweni. Inengi lamangcwaba lithwele indaba ezinkulu, ezingakhulunywanga, eziveza ukuthi singobani, sivelaphi njalo siyaphi.”

Leyinto egcizelelwa njalo nguye uMutambara yena othi iziswe esingelamkhuba wokuloba lokubala sizatshabalala, ngoba inengi lempendulo zokuhluphayo zitholakala ekubaleni.

Facebook Forum

XS
SM
MD
LG