Icele leMDC elikhokhelwa nguMn Morgan Tsvangirai seliveze ukuthukuthela okukhulu ngodaba oluphume emsakazweni weZimbabwe Broadcasting Corporation oluthi ibhomba elidubuke endlini kaMnu Tendai Biti ensukwini ezisanda kwedlula lingaba lithiywe nguBiti ngokwakhe ngenjongo yokuzibulala.
IMDC ithi ibhomba leli lijikwe ngabantu beZanu PF bezama ukubulala uBiti. Ithi imbiko ephume kuZBC ngoLwesithathu ingamanga njalo iveza ukuthi umsakazo lo usekela ibandla leZanu PF okusegcekeni.
IZanu PF yona ithi ibhomba leli lijikwe ngabeMDC ngenjongo yokuthola usekelo kunkokheli yeSadc emhlanganweni ozaqhutshelwa kweleSouth Africa ngoMgqibelo kuhlaziywa udaba lweZimbabwe.
Unobhala jikelele wogatsha lwabatsha kuMDC kaTsvangirai uMnu Promise Mkhwanazi utshele uNtungamili Nkomo weStudio 7 ukuthi ingamanga imbiko yeZBC.