amalinks wokungena

Breaking News

AbeZimbabwe eSouth Africa Basola Abanye Babo Abaphatheka Kubugebengu


Ukuphatheka kwezizalwane zeZimbabwe kusehlakalo sezigebenga ezilitshumi lambili ezibulele amadoda amabili ngenyanga ephelileyo ngokuwaphosela edamu eliseRhodes Park eJohannesburg ebotshwe izandla ngemva kokubamba kokudlwengula owesifazana bebhekile, sekusolwe kakhulu yizizalwane zeZimbabwe kweleSouth Africa.

AbeZimbabwe laba bathi lesi senzo silihlazo njalo sesenze kwabonakala sengathi bonke abavela eZimbabwe ngabadlwenguli lezigebenga. Ababili asebebotshwe ngamapholisa kuloludaba ngabeZimbabwe kanti abalitshumi kabakabanjwa.

BekungeSabatha ntambama mhla ziku 17 kuMfumfu ngesikhathi umuyi umnumnzana Zukiswa Kela lentombiyakhe ndawonye lomngane wakhe lomkakhe, besethekelela eRhodes Park eJohannesburg ukuyabuka imvelo.

Lezizithandani zaficwa yizigebenga ezilitshumi lambili. Lezi zigebenga zabamba omunye wabesifazana ababili laba zamdlwengula. Qede lapho zabopha abesilisa bobabili izandla, zabaphosela edamu bagalula bafa. Lesi yisehlakalo esathukuthelisa phose wonke umuntu wakweleSouth Africa owezwa loludaba.

Khathesike izizalwane zeZimbabwe kweleSouth Africa sezithukuthele zaganunwabu ngemva kokuvela kwembiko ethi izigebenga ezimbili esezibotshiwe ngalesisehlakalo yizizalwane zeZimbabwe.

Umnumnzana Gerald Ncube isiphathamandla se Kalanga Language and Cultural Development Association uthi lihlazo elikhulu elenziwe yintsha yeZimbabwe ephatheke kulesi sinengiso. Uxwayisa intsha ukuthi yekele umkhuba wobusela, ubudlova lobugebenga, esithi inengi yalokhu ibangelwa yikusetshenziswa kwezidakamizwa.

Umculi weZimbabwe odumileyo uTholakele Ndlovu uthi kasikho isizatho esingenza umuntu aze enze ubugebenga obungaka.

Ugogo uSithokozile Nkomo odabuka esigabeni sakoBhodo ePlumtree uthi ukhathazeke kakhulu ngehlekana labatsha eselithe ngokufika kweleSouth Africa lavuka eseganga laba ngamahlonga ndlebe.

Izehlakalo zokubulawa, ukutshontshelwa, ukudutshulwa lokudlwengulwa kwabantu kwele South Africa kusenziwa yizizalwane zeZimbabwe seziyimvama.

Inengike lithi lokhu ngesinye sezizatho ezivusa inhlansi yokuhlaselwa kwabakwamanye amazwe kuleli.

please wait

No media source currently available

0:00 0:02:34 0:00
Lapho esitholakala khona

XS
SM
MD
LG